RING RAWH – Rbt. C. Lalchhuanmawia

Pathian rawng kan bawlna kawngah mi tam tak chu kan beidawng hma em em thin. Hei hi kan rinna a pawnlang lutuk vang niin ka hria. Thenkhat chuan amah kan hlat phah hial thin niin a lang. Mihring chuan kan thil duh a hnena kan thlen hi tuna dawn nghal zel kan duh thin. Pathian kan dil pawhin a chhanna hmuh nghal kan duh bawk thin. Nimahsela, Pathian hian min chhang a nih pawhin a duh hunah tul a tih angin min chhang a ni. Ama hun ruatah lo chuan Pathian a che ngai lo. Hei hi kan hriat thiam loh avangin kan beidawng thin.

Nasa taka kan tawngtaia, kan beih fan fana, rinna kan neih bawk chuan kan tawngtaina chu awlsam takin chhan a ni zel ang tih hi mi thenkhat inzirtir dan a ni. Hei hi a dik lo. Pathian chu ATM (Automatic Teller Machine) khawl an tih (a code number hrilh ruala a chhanna rawn phawrh nghal thin) ang hi a ni lo a nia…

Tawngtai leh Pathian hnena thil dil lampang hi chu inzirtir ngai lovin kan thiam vek mai. Amah-erawhchu, kan dilna nghah dan lai tak hi kan bangbona lai a ni a, a ngaihna kan hre lo a ni. Heti ang hunah tak hian mi tam takte chu kan rinna a lo derthawnga, kan lo tlu leh hman der thin.

Heti zawng hian i ngaihtuah teh ang. Kan tihtheih chu dil hi a ni mai. Pathian tih tur ni a lang chu kan tana tha a nih chuan kan dilna tihhlawhtlin a ni leh mai.

Pathian hnena thil kan dil tawh chuan nawr sek sek a tul lo va, a hnung kan zuina kawnga kan nunphung leh rinna amah hlat zawnga tidanglam veka nghah a tul hek lo. Lalpaa chawl chunga, Pathian hun ruat mila thil lo thleng tur chu amaha rinna tak tak nghat chunga hahdam taka nghah mai zawk tur a ni. Kan beih vak a ngai lo. “Eng vangin nge Pathianin min chhan loh” tia kan buai kan buai a ngai lo. Pathiana innghat chunga a hun takah a ti dawn a ni tih kan rin tlat chuan Pathianin min tih sak ngei ngei dawn a ni.

A hun takah a rawn thleng ang. A hun dik takah a chhanna chu a rawn thleng dawn a ni. Second khat pawhin a tlai lovang. Hemi tichiangtu a tan chuan Hebrai 11:6 thu – ‘Nimahsela, rinna lovin ama lawmzawng mi nih rual a ni lo; Pathian hnena lo kal chuanin, a ni chu a awm tih leh zawngtute hnena lawmman pek hmang a ni tih rin tir a ni,’ tih hi en i la, a chiang lehzual awm e.

Kan beiseina rilru hi i chawisang ang u. Kan rinna hi a ni Pathian chakna tichetu chu. Pathian chu mihring anga tawp chin nei leh zim tak anga ngaih chi a ni lo. A thu kan awi a, kan rin ngam phawt chuan a lak atangin malsawmna kawng hrang hrang, chhiarsen rual loh kan dawng thei ang.

A tawp berah chuan Jakoban(2:14), “Ka unau te u, miin, ‘Rinna ka nei’ ti mah sela, thiltih a neih si loh chuan engnge sawt ang?” a ti. Nang leh kei hian ‘Rinna ka nei’ ti fo thin mah i la, Pathian tan thiltih engemaw tal kan neih ve miau si loh chuan awmzia engmah a nei tak tak lo. Rinna avang ngawt hian nang leh kei hian thiam kan chang ngai lovang. (Jakoba 2:17 & 24-ah) “Chutiangin bawkin rinna chu thiltih nei lovin amah chauhvin a awm chuan thi a ni. Rinna avang ngawt ni lovin, thiltih avang zawkin miin thiam a chang thin tih in hre ta.” a ti leh zel a. Helai thu ka chhiar hian Lal Isuan Lazara farnu Marthi-i hnena, ‘I rin chuan Pathian ropuizia i hmu ang, ka ti lo che em ni?” (Johana 11:40) a tih kha ka hrechhuak leh thin. Rinna leh thiltih (rawngbawlna) kan kal tlantir tlat chuan Pathian hnathawh hi a hun takah, aman tul a tih ang zelin kan hmu ngei ngei dawn a ni. Second khat pawhin a tlai ngai lovang tih i ring tlat ang u.‘Tin, rinna hi thil beiseite awm ngeia hriatna, thil hmuh lohte hriatfiahna a ni.’ tih ziak ang khan…Lalpan a thu kan chhiarchhuah tak chu a chhiartute leh rinnaa kan unau zawng zawngte tan a tharin mal min sawm sak theuh rawh se. Amen.

Posted in Article.