Pawl hruaitu leh mipuite dinhmun bihchianna.. By : Zirmama pa Chandmary, Lawngtlai


Hruaitu:

Hruaitu tel lovin mihring kan khawsa thei lova, mi pahnih emaw, a aia tam emaw awmnaah chuan hruaitu an awm zel thin. Chhungkuaah te, pawl-ah te, kohhran-ah te, khawtlang–ah te, ram leh hnamah te hruaitu tel lovin engmah a tih theih loh. Hruaitu lovin hma a sawn theih loh a, hruaitu awmlohnaah chuan nun a buaiin thiltih a sáwt lova, hmasawn a harsa thin a ni. Mi bîk pawh ni lem lo, a chuha chuh tlingte hian mahni duh zawnga Pawl khalh a, a tirtu PATHIAN leh a hna aiin ‘mahni’ a indah pawimawh a. Thawh tur chin bi tuk insiamin fel taka hlen chhuah hi hna tlâk leh titha niin a inhria a, nihna hlen tháwkin a thaw ham ham tawh mai a ni. Hruaitu ni tura thahnemngaihna tak tak nei phâk lo, a chhehvélah a tlingtla ve mai a ni tih a inhre lo va. A beisei ber fakna tawngkam leh kut ben ri a hriat chu a nun chawmtu hlobet, ni a tlangsana vuai leh mai thin ang mai hi a ni. A tihthat ber cháng pawhin a hruai mipui/member-te hnungah a tlan ve hram hram chauh thin.
Hruaitu chuan a hruaite dinhmun a hre chiang em em tur a ni. Eng pawl leh sakhua pawh nise hruaitu dinhmuna ding, a fawng vuantu leh hnar kaitu ten mahni mi leh sa dinhmun an hriatsak loh hian thil pawi tak a thleng palh thin. Tin, hruaitu thlan leh ruat chungchangah hian fimkhur thiam a pawimawh hle a, hei hian pawl a tizahawmin a tizahawm lo thei bawk a ni. Ngaihtuahna fîm tak hmanga thlan(ruat) chhuah hruaitu chuan pawl tan hmasawnna leh tum ram (Destination) bakah, mimal zahawmna hial pawh a thlen thei bawk a ni. Pawl thenkhatah chuan hruaitu thlan(ruat) chungchangah hian mipui lam an fimkhur tawk loh avangin pawlin a chak loh phah hial thin. Pawlin a thuanawp phaha, mimal zahawmna pawh a tihniamin a tichhe tel bawk a ni. Hruaitu chu thusawi leh thiltihah a hun leh hmun thliar hrang thiam a ni tur a ni. Mahni thawhpui/rawngbawlpui te zahawmna leh dinhmun tichhe thei zawnga tawngkam chhakchhuah ching sawi tur an tam ta viau mai, heti ang mi hi hruaitu atan thlan/ruat loh a him ber.
Tum mumal tak neia midangte tanpui leh kaihruai tura mahni inpêkna hi hruaitu dinhmunin a kawh tum ber a ni awm e. Kan sawi tak angin hruaitu nihna leh mawhphurhna hi mi nazawng tán chelh ve tum ngawt chi a ni lova; mahni kianghnaia khawsa mipuite leh thawhpuite nunphung hrechiang tura mi inzir peih nih a ngai. Hruaitu te hi hruaitu ni tura piang an ni kher lo; tihhmasâwn ngai, inpêkna atanga hlawhtlin tum tlat, tlawm a ngaih huna tlawm ngam leh a harsa lai ber tawn ngam tura huaisen thei ni tura inbuatsaih an nih a pawimawh. Kohhranah ngat phei chuan a rawng kan bawlsak PATHIAN thu nung chhiara zirchiang peih leh a hruai mipuite aia activity hrang hranga tel tam tam, kawng engkima member-te aia hmahruai (advance) tlat thin mi ni thei se a tha ber.
Hruaitu tha nihna (leadership) nena kan ngaihpawlh fo thin, leadership ni silo, mahse inkungkaihna nei ve si a awm—Leadership nei tha tak, dinhmun pawimawha chuangkai silo an awm thei. Tin, dinhmun pawimawha chuangkai nazawng leadership nei tha an ni kher chuang lo bawk. Chutiang bawkin, mifel tak (personality nei tha) te pawh hruaitu tha an ni kher chuang lo. Kohhran hi mi mawng zang satliah te hruai that theih chi a ni ngawt lo. Tin, leadership hi lalna leh thuneihna a ni lo. Johana Bung 13 kan en chuan Lal Isuan a zirtirte ke a silsak thu kan hmua, hruaitu nihna chu intihlalna leh thuneihna lam nilovin, midangte rawngbawl sak hna a ni zawk.
Hruaitu dik tak leh chhawr nahawm ber chu hruaitu nih thlahleh lo, mahse chung lam Thlarau Thianghlimin loh theih lova hruaitu atâna a hlánkaite an ni. Paula hun lai atanga tun hun thleng hian rilru leh thinlung takzeta an dinhmun luah peih lo mihring Lalpa’n chanvo a pe ngai lo. Hruaitu nih thlahlel te hi hruaitu atan an tlâk (Qualified) lo va, hruaitu dik tak chu a inphahhniam a, a inpumpêk a: tin, Thlarauvin hruaitu dang a thlanchhuahte pawh îtsik mai lovin a zui mai hreh lo. Hruaitu tha chuan ruahmanna a siam tawh leh a thil tum te chu thil dang dangah a pakkaisan mai lo va; pawl tâna a thil tumah a ding ngam thin. Hruaitu tam tak chuan hei hi hre lovin thil dang tam takah ngaihtuahna leh beiseina hrang hrang an nei a, chu chuan pawl hmalâkna leh hmasawnna tur a tithuanawp hial a. Hruaitu dinhmuna ding chuan hun remchang a zawng thiam fo tur a ni.
Hruaitu tha chuan thiltihtheihna neih dân te, thuneih dan tâwkte leh hruaitu dinhmuna thil pawimawh te a hriain, midangte tân thiltihtheihna leh chakna a siamsak thiam bawk thin. Mi tam tak chuan hriatna, ruahmanna tha leh thil tithei tura midangte thuneihna neihtir an hlau thin, chu chuan pawlah hruaitu nihna an hloh phah hial a ni. Midangte tichak thei turin mahni kan intihchak thiam a, a hun leh hmun a zira zahawm, nelawm tak nihthiam te a pawimawh.
Mi tam tak chu hruaitu dinhmuna an din rual rualin mahni nihna leh dinhmun theihnghilh ta mai an awm thin; tin, pawl thiltum leh inkaihhruaina pawh hre ta lo sawi tur tam tak an awm bawk. He’ng ang hruaitute hian pawl mi leh sa duhdan leh ngaihdan lakna châng an hre lo va, an ngaihdân leh duhdânin pawl an kaihruaia chu chuan pawl a tidarh a, pawl chhungah khi(gap) siamin innghirnghona leh inkhelh tawnna hial a thlen thin. Hruaitu mawhphurhna hrang hrang zingah pawl leh a chhunga mipuite tihchak leh kaihhruai hi thil pawimawh leh hruaitu tinte tih mâk-mawh a ni awm e. Tin, mahni nihna leh dinhmun hriatchian leh thlir let thiam a finthlâk hle.
Hruaitu dinhmuna han din chiah hian mi tam tak chuan kawng engemawti zawng talin danglamna an nei nghal a – nungchang leh rilru sukthlêkte pawlin a mamawhdân a zirin an siam tha thin. Hruaitu fing chuan pawl lo kaihruai tawh thintute hnu-hma atangin siamthat ngailai leh chhawmzui tur a zir chiang hmasa zet a: chutiang chuan pawlah Mel-lung pawimawh tak a phunzui a, kawng hrang hrangin pawl chu bung thar a kaipui a, pawl chhung mipuite dinhmun siamthain hmasawnna lam a hawipui ta thin a ni. Nimahsela, mi thenkhatte erawh chu heti anga hruaitu dinhmuna an han din ve chiah hian mahni inthununna an tlachham a, thuneihdân tawk thiam lovin pawl leh mipuite an awp hlum hlauh zawk thin. Hruaitu hmasa te sûlhnu chhunzawm tur leh kalphung thara hmalâkna kalpuidân tur te ngaihtuahna lam aiin mimal hmingthat lâkna leh lansarhna lam an dap zawk a – pawl tan harsatna tam tak thlentuah an tang mai zel a, chu chuan mipuite inpumkhatna leh hmalâkna hrang hranga tanrualna tichhiain pawl dinhmun hmasa chu an tihnungtawlh daih ta thin a ni.
Hruaitu mi ngaihsân hlawh tak tak, tlâkhawlhna lian ber chu engkima ‘Ka, keimah’ (myself) tih thlák ve zenna hi a ni. Fakna ri hriat hi a nuam a, mi ngaihsan nih pawh hi thil thlakhlelhawm tak a ni e; nimahse Lal Isuan “Mi zawng zawngin an fak hunah che u in chung a la pik ang” a ti daih mai. Lár tum hi thil atthlâk tak, mahni intihmualphona thlen theitu a ni. Pathian rama rilru leh rorêl leh tihtakzeta thawktu chu lar tum lo mahse thuh-rûk tak tak theih a ni chuang lo. Pawl pakhata an hotupa ber chu a pension a, pawl chuan a tlakhniam phah hle maia, kum 20 chhunga a hruainnaah, amah mimal tha mahse a tlin tâwklohna lan chianna em em chu a aiawh/thachhang dawltu a chher chhuak lo hi a ni. Lal Isua chuan kum thum chhungin a thachhang dawltu tur a hnungzuitute a chher hriam hman a ni.
Tin, hruaitu a nihna chan leh mawhphurhna insem rual a harsatna lo lang ve thei leh, lo awm ve thei te chu – Kan luah tur dinhmun ni awm taka kan lo beisei ve rilrûk midangin an luah hian engtin nge kan ngaih thin? Mahni kan han inbihchian deuh hian hruaitu nihna atanga kan tlinlohna leh fel lohna kan in hmu ve fo thin em? Kan chak lohna lai mi dangten an rawn hmuh ve chiah hian engtin nge kan ngaih thin? tihte hi rilruin mahni leh mahni kan inzawh rilrûk a pawimawh fo. Hruaitu chuan hotu nge ka nih lal? Mipuite chunga leng nge ka nih mipuite rawngbawlsaktu? Hruaitu ka nihdân hian Pathian a tilâwm ang em? Tihte hi ngaihtuah nawn fo a tha ber.

Hruaitu leh mipui inlaichînna:
Hruaitu tha ni tur chuan mipui te nena inremna leh inlaichînna tha tak kan nei tur a ni. Kohhran hruaitu tana hna hahthlâk ber pakhat chu inlaichînna boruak tha vawn reng hi a ni ve thei awm e. Thil tum tihlawhtling tura kutkë ber chu mipuite an nih avangin tih phur, fuih, leh khalh kal reng an ngai a ni. Tin, mipuite inkara inlaichînna tha siam reng a nih loh chuan thawhhona a tha thei lo ang bawkin Pawlin hma a sawn thei lo. A tawpah hruaitu bawk sawisêl an ni leh thin. Dawhtheihna leh taihmakna a pawimawh hle a ni.
Mi tam tak tan pawl leh Kohhrana thil harsa tak ni thin chu dinhmun inanga kan dinpui, kan rawngbawlpuite chawimawi leh duhsak hi an har ber thin. Kan chunga mite emaw, kan hnuaia mite emaw hi kan îtsik ngai lem lo, kan terh phak deuhte leh kan chunga mite bawk hi îtsik an awl thin. Midangte aia chungnun duhnate, dinhmun tha bik luah duhnate hi thawkho kan nihnaa inlaichinna tichhetu a ni fo thin. Chuvang chuan hotu kan ni emaw mipuite kan ni emaw pawl leh kohhran in a hlawkpui theihna tur a nih chuan pheikhai rual taka tan kan lâk rual a, innghirnghona emaw harsatna emaw kan tawh pawhin zaidawh leh thuhnuai rawlh taka inhmangaih tawna kan thawhho a ngai a ni.
Hruaitu dinhmun hi a ropuiin a duhawm a ni. Hruaitu nih tum erawh a sual hran lo va; amaherawhchu, a dinhmun lai chauh thlâkhlelha hi a tha lova, a hruaitu nihna lai hi a pawimawh zawk a ni. Hruaitu nih tum dan tha chu hruaitu dik tak zia pu tura inbuatsaih hi a ni. Hruaitu atâna tlak mihring chuan nihna leh chanvo hranpa chelh lovin nei lo mahsela a hruaitu a ni tho tho thin. Hruaitu dinhmuna din vang ringawta intih lal lutuk te, âwl bik leh hahdam bik nih tum tlat hruaitu an awm hial thin; heti ang hruaitu neih palh hi pawl tan chak lohna thlentu a ni duh viau a, a pumpelh dan kawng awlsam tha ber ni a lang chu – Hruaitu dinhmuna a din hmaah pawl tan eng angin nge ke a pen a, hma a lak thin? A inpêkna a thûk em? tih member ten an zirthiam a pawimawh. Hruaitu thlanna neih anih dawnin hun kal tawha an dinhmun leh inpêkna te ngaihtuah let thiam a finthlâk ber. Henry Miller-a chuan, “Hruaitu dik tak chu hruai ngai lo; midangte tana kawng kawhhmuhtu a ni,” a ti ang hian hruaitu dinhmun chelh tur chuan mi hmangchang hria, insum thei, a hun leh hmun zira mahni insiamrem thiam, mi rinawm leh mahni hnû-hma ngaihtuah thiam nih a ngai.

Mipui/Member-te:
Hruaitu leh mipui/member-te dinhmun hi chuti the hluaia inthlau a ni lo, an pawimawhdân a inang reng a ni tih hi kan hriat fo a tha. Mipuite hi pawl awmtirtu leh hruaitu thlanga ruattu an ni a, a fawng vuantu ber an ni mah mah zawk awm e. Tin, hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni bawk. Kawng hrang hranga hma latu leh hmatheh tur chu mipuite atang bawka thlanchhuah an nih avangin kan hlutna hi kan hriat tlat a pawimawh. Mipui/member ten hruaitu thlan kan thiam chuan pawlin hma a sawn a, a chak bawk thin. Pawl tana biakrawn theih, ruahmanna siam leh hmalâkna kawng hrang hranga kan aiawh thlang theitu mipuite hian hruaitu thlandân pawh kan thiam a pawimawh.
Pawl mi leh sa (mipui) te hi hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni tih kha thu hmasa lamah kan sawi tawh a. Hei hi thudik leh pawl hmel landan tichiangtu pawimawh ber pawh kan ti thei ang. Mipui/Member (Pawl mi leh sa) ten hruaitu an endan te, inpekdan leh hmalakna an kalpuidân a zirin hruaitu dinhmuna dingte chu an lang mawiin; an lang mawi lo thei a ni. Hruaitute hi kan aiawha thlan/ruat an ni tih avang ngawta duhna lam lama pawhkawi leh khalhkual mai mai tur an ni lo. Theih tawk leh tlin tawk nei ve tho an ni tih hi kan hriatsak fo a ngai a ni.
Mipui/member (pawl mi leh sa) te inpêkna a nasat zawh poh leh pawlin hruaitu tha kan nei mai zawk a ni. Hruaitu tha leh tha lo hretu chu mipui lam an ni a. Tu nge thlak ngai a; tu nge hruaitu dinhmun chelh zui tlak? tih te hi mipuiah a innghat mah mah zawk a ni. Mipui tanrualnaah chuan pawl a nuam a, hruaitute pawh an chak thin. Hruaitu dinhmuna dingte inkara thil fel lo leh inhmuh thiam lohna a awm chàng pawha zaizâptu tur chu mipuite bawk hi an ni. Mipui/member (pawl mi leh sa) te inkaraah thil fel lo a awm palh chuan hruaituteah a langchhuak mai thin, chu chuan pawl chhungah khi a siam a, mimala inhuatna hial a hringchhuak ta thin a ni. Eng pawlah pawh awm ila – pawl tana mi tha leh rintlâk nih hi mi tinte tana kan tih-mâk-mawh ber a ni.
Mipuite hi min hruaitu tur thlanga ruattute kan nih avangin pawl/Kohhran chhunga mimal tinte dinhmun pawh kan inhriattawn a ngai em em a ni. Kohhranah ngat phei chuan min hruaitu tur kan thlan dawnin heng tehkhawng (criteria)-te hi mipui ten a rûkin kan neih a ngai: Kohhran Programme, Activity hrang hrangah te, keimahni zawna rawngbawlna huangah kan aia inhmang tam leh tel tha te, inkhawm leh Sunday School ngaipawimawh, hnatlân nikhuaa chhuak tam a ni em? A rawng kan bawlsak PATHIAN thu hriatna lamah engnge a dinhmun, min zirtira thu tak lama min kaihruai theitu a ni thei ang em? Kohhran serhsang – Kohhran mi ten kan tih tur leh tih loh tur thliar hrang thiam leh ngaipawimawh a ni em? Mipui/member-te hmahruaitu nge anih a, an hnunga ke pen ve mai mai zawk? tihte thleng hian kan inhriatsak a pawimawh viau mai.
Mipuite kan fimkhur loh hian pawl leh Kohhran chu a kal sual fo thin. Pawl/Kohhran thenkhat hruaitu thlan leh ruat chungchangah thian tha, unau leh chhungkhat ang zawnga an kal avanga buai sawi tur an tam ta hle, hei hi pumpelh tum theuh ila a tha khawp mai. Tin, hetiang rilrupú kan lo awm anih chuan i sim ngam ang u. Kohhran ngat phei chu min dintu PATHIAN hi PATHIAN thîkthuchhia anih avangin kan fimkhur a pawimawh em em a, Kohhran duhdan leh serhsang ngaipawimawh lo, zu leh ruihtheih thil, eirûkna nena inkaihhnawih mihring chu hruaitu atan thlan loh leh ruat loh ngam a tha ber. Kohhran huanga hruaitu leh mawhphurtu ruat kawngah pawh kan duhtui a hun tawh takzet a ni. Kan PATHIAN hian baala hmaa thingthi ngai lo mihring a ngah lutuk tlat tih hi i haider fo lovang u. Tirhkoh Paula’n, “Zirtirna dik an ngaih peih loh hun a la thleng dawn si; an bengte a zat avangin anmahni duhzawng angin zirtirtute an hnenah an khawm zawk ang a, an bengte chu thutak lamah an chhungawng ang a, thawnthu lam panin an peng tawh ang. Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh,” ti a (II Tim. 4:3-5) Timothea hnêna a fuihna hi kan hriat nawn fo a pawimawh tak meuh meuh a ni.

Ngaihtuahzui atân….
1. Hruaitu kan thlan hian pawl hmangaihtu – pawl tâna mi tangkai, hmalâkna hrang hranga sûlsutu lo ni tawh thin leh pawl/Kohhran tâna mi hmingtha lo ni tawhte kan thlang thinin kan hria em? Nge, unau, chhungkhat leh thian thate zing atangin kan thlang mai thin zawk? Eng nge kan tehfung?
2. Kohhran hruaitu ni si, mipui/member-te hnunga kal ve satliah ringawt a awm theih ang em?
3. Kohhran hruaitu atân hian Pathian thu chhiara zirzui peih, zirtir thiam te; inkhâwm, Sunday School, zaikhâwm, Committee, hnatlâng leh Kohhran programme hrang hranga mi inhmang peih tak takte chauh hi thlang/ruat ta thin ila Pathian duhdân a ni mai lovang maw?
4. Zu, ruihtheih thil leh Kohhranin a pawm loh thildangte nena inkaihhnawih hruaitu atan kan thlang fo hi tha kan ti em? mawhphurhna pêk zêl chi-ah kan ngai em?
5. Mipui/member-te hian hruaitu atana kan thlan/ruatte dinhmun leh pawl/ Kohhran tana an activity hi kan thlír letpui thin; nge, kan thlang a kan duh tawk mai thin zawk?

Posted in Article.