Covenant

 KOHHRAN THUTHLUNG (COVENANT)
Kan Kohhran chuan kan thurin tlangpui puanchhuahte bakah kan rilru, thiltih leh hnathawh kaihruaitu atan Thuthlung Hlui leh Thuthlung Thar tlawh chhanin a hnuaia thuthlung (covenant) te hi a siam a ni:
a) Engkim siamtu Pathian chuan leilung leh a chhunga thil awm zawng zawng – hnam te, chi te leh tawng te a siam a, hnam tin zingah inchawimawi a duh a; keini pawh Ama siam kan ni (Gen. 2; Sam 24:1; 46:10; Job 38:1 ff).
b) Pathian chuan hnam tinte chu an awmna tur a ruat a, an awmna rite pawh a khamsak a, kan chenna pawh Pathian min pek a ni (Deut. 32:8; Tirh. 17:26).
c) Khawvela mi zawng zawng hi bul hmun khat veka siam kan nih avangin thlahtu thuhmun leh unau vek kan ni a, Pathianin thleibik a nei lo. A mihring siamte chu chhungkua te, chi te, hnam leh ramte ang zela awma, khawsa turin a ruat tih kan ring (Gen. 1:28; Tirh. 17:26; Rom 11).
d) Pathianin he khawvela a thilsiamte hi an nihna leh chanvo tur a ruatsak a, inngeiha zalen turin a duh a. Dik lo taka inrahbeh te, inawpbeh luihna te, dikna inpalzutsak te hi Pathian duhzawng a ni lo tih kan ring. (Exo. 10:3)
e) Lalpa rawngbawl duh lo hnam leh ram chu an la boral dawn a ni tih Bible-in a sawi a. Keini pawhin mihring duhzawng ni lovin, sorkar leh pawl rawng bawl hek lovin, Lalpa rawng kan bawl ang a, a thu ang zelin Pathian thilsiam tinreng hnenah Chanchin |ha chu kan hril zel ang (Isa. 60:12; Mt. 28:18-20; 21:43).
f) Isua Krista Chanchin Tha thlenna apiangah taksa leh Thlarau malsawmna a awm a; Chanchin Tha buaipuitute chu Pathianin a buaipui thin tih kan ring. Kohhran dinchhan ber chu Chanchin Tha hrilh a ni a, Krista thupek chu zawma khawvela hnam tinte hnena hril chu kan tihmakmawh leh mawhphurhna a ni tih kan hria (Gen. 12:3; Sam 126:5,6; Mark. 13:10).
g) Kohhran chuan Zawlnei rawngbawl hna (Prophetic ministry) a chhunzawm a. Ram leh khawtlang siamthatna te, mihring chanvo zalenna leh dikna atan te, rorelna dik leh fel a awm theihna tura thutak puanchhuahte hi a tihtur a ni. Thu chauh ni lovin, nun leh thiltih hmanga Pathian ram chu din tur a ni (Isaia 61:1-3; 58:12; Jer. 1:9; Sam 126:1-4; Mat. 5:1-9).
h) Ram/hnam pual ang zela Kohhran neih hi siamtu, Pathian duhdan a nih kan ring. Pathianin hnam tin leh ram tina rawngbawl turin a kova, chu kohna chu keini pawhin kan chhang a ni. Pathianin a ram leh hnam pum huapa Kohhran min pekte hi kan ram leh hnam mipuite inpumkhatna leh awmna tur a nih ngei kan ring (Mt. 21:43; Jn. 15:16; Thup 21:24-26).
i) Khawvel pumah ramtin leh hnam tin zinga Pathian Kohhranho, ringtute hi thlarauva inpumkhata, thawkhova, tangrual tur kan nihzia kan inhria (Jn. 17:20-26).
j) Pathianin kan hnam leh ramah roreltu min pe tih kan ring a, roreltute thu thua awm tur kan ni. Roreltute thuzawm chu sual lam kawngah ni lovin, Pathian lam kawngah a ni tur a ni. Roreltuten Pathian duhzawnga ro an rel fo theih nan tawngtai, thurawn pek leh zilh te pawh Pathian mite tihtur a ni tih kan pawm (Rom 13:23; Ephe 6:5-8). Pathian thuin min kawhhmuh angin engkim hi Lalpa siam leh a ta kan ni. Kan ram leilung leh a chhunga thil awm te, nunna leh malsawmna zawng zawngte hi Lalpa laka kan dawn an ni. Pathian malsawmna kan dawn atangin a ram zau zel nan mi tin, chhungkaw tin, hnam tinin Lalpa chanpual SAWMA PAKHAT Pathian hnena hlanlet hi kan tih ngei tur a ni tih kan pawm. Sawma Pakhat chauh ni lovin, thilpek dang te (thil hlan te) kan hlan tur a ni tih kan pawm bawk (Mal. 3:6-12).