Objectives

Lairam Isua Krista Baptist Kohhran chuan a din chhan Pathian ram a lo thlen theihna turin a hnuaia thiltumte hi Thlarau Thianghlim thiltihtheihna rinchhanin tih a tum ang.
a) Chanchin Tha puandarh: Kan Lalpa thupek anga Pathian ram Chanchin Tha thu leh thiltiha puanchhuah a; ringlote Krista hnena hruai.
b) Kohhran enkawl leh din: Lairam Isua Krista Baptist Kohhran ding tawh sa enkawl, tihngheh leh tihhmasawna, a remchanna hmun apianga Kohhran din belh zel.
c) Khawtlang nun siamthat leh tihhmasawn: Mihring dikna leh zalenna humhalh te, mi zawng zawng tana inremna kawng zawn te, thilsiam dangte enkawl leh humhalh te, ram leh hnam inpumkhat nana thawh te, mipui rilru leh khawsak tichangkang tura zirtir te, ram hmasawnna leh khua leh tui tha ni tura sorkar leh pawlho dangte thawhpui.
d) Rethei leh tanpui ngaite chhawmdawl: Mi rethei mahnia inkhai chhuak thei lo te, hnuchham te, fahrah enkawltu nei lo te, hmeithai rethei te, pianphunga rualbanlo te, pem vakvai tanpui ngai te tanpui leh enkawl te; chhiat rupna (natural calamities) hrang hrang – kangmei, thlipui, tuilian, leimin, lirnghing, khawkheng – vanga tuar te leh tâm tuar te chhawmdawl te; chutiang mite zinga chhawmdawl hna thawktu pawlte nena thawhho leh tanpuina pek te.
e) Tihdamna leh mipui vantlang hriselna tura rawngbawl: Lal Isua tihdam rawngbawlna chhunzawmin damlote enkawl hna a thawk ang a. Damdawi in te, damlo inentirna leh damdawi lakna inte buatsaihin a enkawl ang. Mipuite hnenah vantlang hriselna leh thianghlimna lam thilah zirtirna a pe ang a. Damdawi leh hriselna lama rawngbawl hna thawk turin doctor te, nurse te, midwife leh damdawi lam thiamna hrang hranga thawk tur mite zirtirin a buatsaih ang.
f) Thuziak leh inbiak pawhna hmanrua hmanga rawngbawl: Chanchinbu chhuah, lehkhabu siam chhuah, seminar leh workshop hrang hrang hmanga Kristian inzirtirna thehdarh te; khawl chhutna (printing press) leh lehkhabu zawrhna (bookroom) buatsaih leh enkawl te; inbiak pawhna hmanraw hrang hrang – music, radio, visual aids, drama, painting leh a dangte hmanga Kristian zirtirna puanchhuah leh rawngbawl.
g) Zirna lama rawngbawl: Sunday school, Beirual thuzir leh zirlai chi hrang hrang hmanga Kohhranho zirtir leh kaihhruai te; sakhaw lam thil ni kher lo, mipui vantlang tana thil tul leh tangkai tur zirhona buatsaih leh zirna school din leh enkawl te.
h) Kohhran leh Pawl dangte nena thawhho: Kohhran pawl dang te, Tlawmngai Pawl hrang hrang leh sorkar te nena inlaichinna tha tak neia Pathian leh kan ram tana thawhho.