Pawl hruaitu leh mipuite dinhmun bihchianna.. By : Zirmama pa Chandmary, Lawngtlai


Hruaitu:

Hruaitu tel lovin mihring kan khawsa thei lova, mi pahnih emaw, a aia tam emaw awmnaah chuan hruaitu an awm zel thin. Chhungkuaah te, pawl-ah te, kohhran-ah te, khawtlang–ah te, ram leh hnamah te hruaitu tel lovin engmah a tih theih loh. Hruaitu lovin hma a sawn theih loh a, hruaitu awmlohnaah chuan nun a buaiin thiltih a sáwt lova, hmasawn a harsa thin a ni. Mi bîk pawh ni lem lo, a chuha chuh tlingte hian mahni duh zawnga Pawl khalh a, a tirtu PATHIAN leh a hna aiin ‘mahni’ a indah pawimawh a. Thawh tur chin bi tuk insiamin fel taka hlen chhuah hi hna tlâk leh titha niin a inhria a, nihna hlen tháwkin a thaw ham ham tawh mai a ni. Hruaitu ni tura thahnemngaihna tak tak nei phâk lo, a chhehvélah a tlingtla ve mai a ni tih a inhre lo va. A beisei ber fakna tawngkam leh kut ben ri a hriat chu a nun chawmtu hlobet, ni a tlangsana vuai leh mai thin ang mai hi a ni. A tihthat ber cháng pawhin a hruai mipui/member-te hnungah a tlan ve hram hram chauh thin.
Hruaitu chuan a hruaite dinhmun a hre chiang em em tur a ni. Eng pawl leh sakhua pawh nise hruaitu dinhmuna ding, a fawng vuantu leh hnar kaitu ten mahni mi leh sa dinhmun an hriatsak loh hian thil pawi tak a thleng palh thin. Tin, hruaitu thlan leh ruat chungchangah hian fimkhur thiam a pawimawh hle a, hei hian pawl a tizahawmin a tizahawm lo thei bawk a ni. Ngaihtuahna fîm tak hmanga thlan(ruat) chhuah hruaitu chuan pawl tan hmasawnna leh tum ram (Destination) bakah, mimal zahawmna hial pawh a thlen thei bawk a ni. Pawl thenkhatah chuan hruaitu thlan(ruat) chungchangah hian mipui lam an fimkhur tawk loh avangin pawlin a chak loh phah hial thin. Pawlin a thuanawp phaha, mimal zahawmna pawh a tihniamin a tichhe tel bawk a ni. Hruaitu chu thusawi leh thiltihah a hun leh hmun thliar hrang thiam a ni tur a ni. Mahni thawhpui/rawngbawlpui te zahawmna leh dinhmun tichhe thei zawnga tawngkam chhakchhuah ching sawi tur an tam ta viau mai, heti ang mi hi hruaitu atan thlan/ruat loh a him ber.
Tum mumal tak neia midangte tanpui leh kaihruai tura mahni inpêkna hi hruaitu dinhmunin a kawh tum ber a ni awm e. Kan sawi tak angin hruaitu nihna leh mawhphurhna hi mi nazawng tán chelh ve tum ngawt chi a ni lova; mahni kianghnaia khawsa mipuite leh thawhpuite nunphung hrechiang tura mi inzir peih nih a ngai. Hruaitu te hi hruaitu ni tura piang an ni kher lo; tihhmasâwn ngai, inpêkna atanga hlawhtlin tum tlat, tlawm a ngaih huna tlawm ngam leh a harsa lai ber tawn ngam tura huaisen thei ni tura inbuatsaih an nih a pawimawh. Kohhranah ngat phei chuan a rawng kan bawlsak PATHIAN thu nung chhiara zirchiang peih leh a hruai mipuite aia activity hrang hranga tel tam tam, kawng engkima member-te aia hmahruai (advance) tlat thin mi ni thei se a tha ber.
Hruaitu tha nihna (leadership) nena kan ngaihpawlh fo thin, leadership ni silo, mahse inkungkaihna nei ve si a awm—Leadership nei tha tak, dinhmun pawimawha chuangkai silo an awm thei. Tin, dinhmun pawimawha chuangkai nazawng leadership nei tha an ni kher chuang lo bawk. Chutiang bawkin, mifel tak (personality nei tha) te pawh hruaitu tha an ni kher chuang lo. Kohhran hi mi mawng zang satliah te hruai that theih chi a ni ngawt lo. Tin, leadership hi lalna leh thuneihna a ni lo. Johana Bung 13 kan en chuan Lal Isuan a zirtirte ke a silsak thu kan hmua, hruaitu nihna chu intihlalna leh thuneihna lam nilovin, midangte rawngbawl sak hna a ni zawk.
Hruaitu dik tak leh chhawr nahawm ber chu hruaitu nih thlahleh lo, mahse chung lam Thlarau Thianghlimin loh theih lova hruaitu atâna a hlánkaite an ni. Paula hun lai atanga tun hun thleng hian rilru leh thinlung takzeta an dinhmun luah peih lo mihring Lalpa’n chanvo a pe ngai lo. Hruaitu nih thlahlel te hi hruaitu atan an tlâk (Qualified) lo va, hruaitu dik tak chu a inphahhniam a, a inpumpêk a: tin, Thlarauvin hruaitu dang a thlanchhuahte pawh îtsik mai lovin a zui mai hreh lo. Hruaitu tha chuan ruahmanna a siam tawh leh a thil tum te chu thil dang dangah a pakkaisan mai lo va; pawl tâna a thil tumah a ding ngam thin. Hruaitu tam tak chuan hei hi hre lovin thil dang tam takah ngaihtuahna leh beiseina hrang hrang an nei a, chu chuan pawl hmalâkna leh hmasawnna tur a tithuanawp hial a. Hruaitu dinhmuna ding chuan hun remchang a zawng thiam fo tur a ni.
Hruaitu tha chuan thiltihtheihna neih dân te, thuneih dan tâwkte leh hruaitu dinhmuna thil pawimawh te a hriain, midangte tân thiltihtheihna leh chakna a siamsak thiam bawk thin. Mi tam tak chuan hriatna, ruahmanna tha leh thil tithei tura midangte thuneihna neihtir an hlau thin, chu chuan pawlah hruaitu nihna an hloh phah hial a ni. Midangte tichak thei turin mahni kan intihchak thiam a, a hun leh hmun a zira zahawm, nelawm tak nihthiam te a pawimawh.
Mi tam tak chu hruaitu dinhmuna an din rual rualin mahni nihna leh dinhmun theihnghilh ta mai an awm thin; tin, pawl thiltum leh inkaihhruaina pawh hre ta lo sawi tur tam tak an awm bawk. He’ng ang hruaitute hian pawl mi leh sa duhdan leh ngaihdan lakna châng an hre lo va, an ngaihdân leh duhdânin pawl an kaihruaia chu chuan pawl a tidarh a, pawl chhungah khi(gap) siamin innghirnghona leh inkhelh tawnna hial a thlen thin. Hruaitu mawhphurhna hrang hrang zingah pawl leh a chhunga mipuite tihchak leh kaihhruai hi thil pawimawh leh hruaitu tinte tih mâk-mawh a ni awm e. Tin, mahni nihna leh dinhmun hriatchian leh thlir let thiam a finthlâk hle.
Hruaitu dinhmuna han din chiah hian mi tam tak chuan kawng engemawti zawng talin danglamna an nei nghal a – nungchang leh rilru sukthlêkte pawlin a mamawhdân a zirin an siam tha thin. Hruaitu fing chuan pawl lo kaihruai tawh thintute hnu-hma atangin siamthat ngailai leh chhawmzui tur a zir chiang hmasa zet a: chutiang chuan pawlah Mel-lung pawimawh tak a phunzui a, kawng hrang hrangin pawl chu bung thar a kaipui a, pawl chhung mipuite dinhmun siamthain hmasawnna lam a hawipui ta thin a ni. Nimahsela, mi thenkhatte erawh chu heti anga hruaitu dinhmuna an han din ve chiah hian mahni inthununna an tlachham a, thuneihdân tawk thiam lovin pawl leh mipuite an awp hlum hlauh zawk thin. Hruaitu hmasa te sûlhnu chhunzawm tur leh kalphung thara hmalâkna kalpuidân tur te ngaihtuahna lam aiin mimal hmingthat lâkna leh lansarhna lam an dap zawk a – pawl tan harsatna tam tak thlentuah an tang mai zel a, chu chuan mipuite inpumkhatna leh hmalâkna hrang hranga tanrualna tichhiain pawl dinhmun hmasa chu an tihnungtawlh daih ta thin a ni.
Hruaitu mi ngaihsân hlawh tak tak, tlâkhawlhna lian ber chu engkima ‘Ka, keimah’ (myself) tih thlák ve zenna hi a ni. Fakna ri hriat hi a nuam a, mi ngaihsan nih pawh hi thil thlakhlelhawm tak a ni e; nimahse Lal Isuan “Mi zawng zawngin an fak hunah che u in chung a la pik ang” a ti daih mai. Lár tum hi thil atthlâk tak, mahni intihmualphona thlen theitu a ni. Pathian rama rilru leh rorêl leh tihtakzeta thawktu chu lar tum lo mahse thuh-rûk tak tak theih a ni chuang lo. Pawl pakhata an hotupa ber chu a pension a, pawl chuan a tlakhniam phah hle maia, kum 20 chhunga a hruainnaah, amah mimal tha mahse a tlin tâwklohna lan chianna em em chu a aiawh/thachhang dawltu a chher chhuak lo hi a ni. Lal Isua chuan kum thum chhungin a thachhang dawltu tur a hnungzuitute a chher hriam hman a ni.
Tin, hruaitu a nihna chan leh mawhphurhna insem rual a harsatna lo lang ve thei leh, lo awm ve thei te chu – Kan luah tur dinhmun ni awm taka kan lo beisei ve rilrûk midangin an luah hian engtin nge kan ngaih thin? Mahni kan han inbihchian deuh hian hruaitu nihna atanga kan tlinlohna leh fel lohna kan in hmu ve fo thin em? Kan chak lohna lai mi dangten an rawn hmuh ve chiah hian engtin nge kan ngaih thin? tihte hi rilruin mahni leh mahni kan inzawh rilrûk a pawimawh fo. Hruaitu chuan hotu nge ka nih lal? Mipuite chunga leng nge ka nih mipuite rawngbawlsaktu? Hruaitu ka nihdân hian Pathian a tilâwm ang em? Tihte hi ngaihtuah nawn fo a tha ber.

Hruaitu leh mipui inlaichînna:
Hruaitu tha ni tur chuan mipui te nena inremna leh inlaichînna tha tak kan nei tur a ni. Kohhran hruaitu tana hna hahthlâk ber pakhat chu inlaichînna boruak tha vawn reng hi a ni ve thei awm e. Thil tum tihlawhtling tura kutkë ber chu mipuite an nih avangin tih phur, fuih, leh khalh kal reng an ngai a ni. Tin, mipuite inkara inlaichînna tha siam reng a nih loh chuan thawhhona a tha thei lo ang bawkin Pawlin hma a sawn thei lo. A tawpah hruaitu bawk sawisêl an ni leh thin. Dawhtheihna leh taihmakna a pawimawh hle a ni.
Mi tam tak tan pawl leh Kohhrana thil harsa tak ni thin chu dinhmun inanga kan dinpui, kan rawngbawlpuite chawimawi leh duhsak hi an har ber thin. Kan chunga mite emaw, kan hnuaia mite emaw hi kan îtsik ngai lem lo, kan terh phak deuhte leh kan chunga mite bawk hi îtsik an awl thin. Midangte aia chungnun duhnate, dinhmun tha bik luah duhnate hi thawkho kan nihnaa inlaichinna tichhetu a ni fo thin. Chuvang chuan hotu kan ni emaw mipuite kan ni emaw pawl leh kohhran in a hlawkpui theihna tur a nih chuan pheikhai rual taka tan kan lâk rual a, innghirnghona emaw harsatna emaw kan tawh pawhin zaidawh leh thuhnuai rawlh taka inhmangaih tawna kan thawhho a ngai a ni.
Hruaitu dinhmun hi a ropuiin a duhawm a ni. Hruaitu nih tum erawh a sual hran lo va; amaherawhchu, a dinhmun lai chauh thlâkhlelha hi a tha lova, a hruaitu nihna lai hi a pawimawh zawk a ni. Hruaitu nih tum dan tha chu hruaitu dik tak zia pu tura inbuatsaih hi a ni. Hruaitu atâna tlak mihring chuan nihna leh chanvo hranpa chelh lovin nei lo mahsela a hruaitu a ni tho tho thin. Hruaitu dinhmuna din vang ringawta intih lal lutuk te, âwl bik leh hahdam bik nih tum tlat hruaitu an awm hial thin; heti ang hruaitu neih palh hi pawl tan chak lohna thlentu a ni duh viau a, a pumpelh dan kawng awlsam tha ber ni a lang chu – Hruaitu dinhmuna a din hmaah pawl tan eng angin nge ke a pen a, hma a lak thin? A inpêkna a thûk em? tih member ten an zirthiam a pawimawh. Hruaitu thlanna neih anih dawnin hun kal tawha an dinhmun leh inpêkna te ngaihtuah let thiam a finthlâk ber. Henry Miller-a chuan, “Hruaitu dik tak chu hruai ngai lo; midangte tana kawng kawhhmuhtu a ni,” a ti ang hian hruaitu dinhmun chelh tur chuan mi hmangchang hria, insum thei, a hun leh hmun zira mahni insiamrem thiam, mi rinawm leh mahni hnû-hma ngaihtuah thiam nih a ngai.

Mipui/Member-te:
Hruaitu leh mipui/member-te dinhmun hi chuti the hluaia inthlau a ni lo, an pawimawhdân a inang reng a ni tih hi kan hriat fo a tha. Mipuite hi pawl awmtirtu leh hruaitu thlanga ruattu an ni a, a fawng vuantu ber an ni mah mah zawk awm e. Tin, hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni bawk. Kawng hrang hranga hma latu leh hmatheh tur chu mipuite atang bawka thlanchhuah an nih avangin kan hlutna hi kan hriat tlat a pawimawh. Mipui/member ten hruaitu thlan kan thiam chuan pawlin hma a sawn a, a chak bawk thin. Pawl tana biakrawn theih, ruahmanna siam leh hmalâkna kawng hrang hranga kan aiawh thlang theitu mipuite hian hruaitu thlandân pawh kan thiam a pawimawh.
Pawl mi leh sa (mipui) te hi hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni tih kha thu hmasa lamah kan sawi tawh a. Hei hi thudik leh pawl hmel landan tichiangtu pawimawh ber pawh kan ti thei ang. Mipui/Member (Pawl mi leh sa) ten hruaitu an endan te, inpekdan leh hmalakna an kalpuidân a zirin hruaitu dinhmuna dingte chu an lang mawiin; an lang mawi lo thei a ni. Hruaitute hi kan aiawha thlan/ruat an ni tih avang ngawta duhna lam lama pawhkawi leh khalhkual mai mai tur an ni lo. Theih tawk leh tlin tawk nei ve tho an ni tih hi kan hriatsak fo a ngai a ni.
Mipui/member (pawl mi leh sa) te inpêkna a nasat zawh poh leh pawlin hruaitu tha kan nei mai zawk a ni. Hruaitu tha leh tha lo hretu chu mipui lam an ni a. Tu nge thlak ngai a; tu nge hruaitu dinhmun chelh zui tlak? tih te hi mipuiah a innghat mah mah zawk a ni. Mipui tanrualnaah chuan pawl a nuam a, hruaitute pawh an chak thin. Hruaitu dinhmuna dingte inkara thil fel lo leh inhmuh thiam lohna a awm chàng pawha zaizâptu tur chu mipuite bawk hi an ni. Mipui/member (pawl mi leh sa) te inkaraah thil fel lo a awm palh chuan hruaituteah a langchhuak mai thin, chu chuan pawl chhungah khi a siam a, mimala inhuatna hial a hringchhuak ta thin a ni. Eng pawlah pawh awm ila – pawl tana mi tha leh rintlâk nih hi mi tinte tana kan tih-mâk-mawh ber a ni.
Mipuite hi min hruaitu tur thlanga ruattute kan nih avangin pawl/Kohhran chhunga mimal tinte dinhmun pawh kan inhriattawn a ngai em em a ni. Kohhranah ngat phei chuan min hruaitu tur kan thlan dawnin heng tehkhawng (criteria)-te hi mipui ten a rûkin kan neih a ngai: Kohhran Programme, Activity hrang hrangah te, keimahni zawna rawngbawlna huangah kan aia inhmang tam leh tel tha te, inkhawm leh Sunday School ngaipawimawh, hnatlân nikhuaa chhuak tam a ni em? A rawng kan bawlsak PATHIAN thu hriatna lamah engnge a dinhmun, min zirtira thu tak lama min kaihruai theitu a ni thei ang em? Kohhran serhsang – Kohhran mi ten kan tih tur leh tih loh tur thliar hrang thiam leh ngaipawimawh a ni em? Mipui/member-te hmahruaitu nge anih a, an hnunga ke pen ve mai mai zawk? tihte thleng hian kan inhriatsak a pawimawh viau mai.
Mipuite kan fimkhur loh hian pawl leh Kohhran chu a kal sual fo thin. Pawl/Kohhran thenkhat hruaitu thlan leh ruat chungchangah thian tha, unau leh chhungkhat ang zawnga an kal avanga buai sawi tur an tam ta hle, hei hi pumpelh tum theuh ila a tha khawp mai. Tin, hetiang rilrupú kan lo awm anih chuan i sim ngam ang u. Kohhran ngat phei chu min dintu PATHIAN hi PATHIAN thîkthuchhia anih avangin kan fimkhur a pawimawh em em a, Kohhran duhdan leh serhsang ngaipawimawh lo, zu leh ruihtheih thil, eirûkna nena inkaihhnawih mihring chu hruaitu atan thlan loh leh ruat loh ngam a tha ber. Kohhran huanga hruaitu leh mawhphurtu ruat kawngah pawh kan duhtui a hun tawh takzet a ni. Kan PATHIAN hian baala hmaa thingthi ngai lo mihring a ngah lutuk tlat tih hi i haider fo lovang u. Tirhkoh Paula’n, “Zirtirna dik an ngaih peih loh hun a la thleng dawn si; an bengte a zat avangin anmahni duhzawng angin zirtirtute an hnenah an khawm zawk ang a, an bengte chu thutak lamah an chhungawng ang a, thawnthu lam panin an peng tawh ang. Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh,” ti a (II Tim. 4:3-5) Timothea hnêna a fuihna hi kan hriat nawn fo a pawimawh tak meuh meuh a ni.

Ngaihtuahzui atân….
1. Hruaitu kan thlan hian pawl hmangaihtu – pawl tâna mi tangkai, hmalâkna hrang hranga sûlsutu lo ni tawh thin leh pawl/Kohhran tâna mi hmingtha lo ni tawhte kan thlang thinin kan hria em? Nge, unau, chhungkhat leh thian thate zing atangin kan thlang mai thin zawk? Eng nge kan tehfung?
2. Kohhran hruaitu ni si, mipui/member-te hnunga kal ve satliah ringawt a awm theih ang em?
3. Kohhran hruaitu atân hian Pathian thu chhiara zirzui peih, zirtir thiam te; inkhâwm, Sunday School, zaikhâwm, Committee, hnatlâng leh Kohhran programme hrang hranga mi inhmang peih tak takte chauh hi thlang/ruat ta thin ila Pathian duhdân a ni mai lovang maw?
4. Zu, ruihtheih thil leh Kohhranin a pawm loh thildangte nena inkaihhnawih hruaitu atan kan thlang fo hi tha kan ti em? mawhphurhna pêk zêl chi-ah kan ngai em?
5. Mipui/member-te hian hruaitu atana kan thlan/ruatte dinhmun leh pawl/ Kohhran tana an activity hi kan thlír letpui thin; nge, kan thlang a kan duh tawk mai thin zawk?

CALVARY TUALCHHUNG KOHHRAN CHANCHIN TLANGPUI.. By V. Thangcheu

“Aw, tlangmawi CALVARY miten hmusit mahse, Tlang dang zawng zawng aiin kei chuan ka ngaina hle, Pathian thisen a luanna chu” tia kan sak thin hming chawia ding CALVARY Biak In leh he Biak In a inkhawm (lawi) thin te hian danglamna bik an nei a. He BIAKIN hi chhawng li tura din a ni a, a chungber chu la zawhloh a ni.A chhawng thumna torah hian Pathian Biak Inkhawm nan hman rih a ni. A chhanwg hnihna chu Room 2-ah then niin, Room pakhat zawk chu LIKBK Assembly-in CHARITY SHOP-ah hmanginnula fel tak Jessie Lalthanpui`n a nghak thin a ni.
Room pakhat chu CHHIN COMMUNITY INFORMATION CENTRE atan, The Ludia Project Implementing Committee-in a siam a, he hmun hi Pu V.Zirsanga, Executive Member LADC in 15.03.2012 kha a hawng a ni.
Tin, he Biak Ina inkhawm te hi miin luah hawh a awm deuh vek an nih avangin vanduaina, thihna an tawhin ruang thutpui nan an hmang thin a. Chulovah inhlawhfa leh sumdawng/awmna neilo thite an awmin ruang zalh nan leh thutpui nan hman a ni bawk.
Tin, an Kohhrana Thuhril pawimawh bikte chu hrtah hian an thleng bawk thin. Eirawngbawlna, inthiarna leh mutna khum nuam tak te a awm bawk a ni.
He CALVARY Biak In hi a dung ft63 a vang ft30 a din a ni a, a hnuai ber chu Kristmas, Kumthar leh ruai kilho hun apianga ruai siam nan leh ruai kilho nan hman thin a ni. Hetah hian inthiarna hmun 3 lai, thianghlim taka siam ani bawk.
Tin, CALVARY Biak In hi Lai Tawng veka Pathian Biak leh fakna a ni bawk. Lai hnam nihna diktaka Pathian Biakna hmun a ni. Chandmary Pastor Bial Local Church 4 zinga Local pakhat niin Rev. H Lalhmangaiha`n a bial lai a ni. An Tualchhung Kohhran hruaitute chu:
Upa T.Thangchuak – Local Pastor
Upa Z. Nitling – Chairman
Upa Altiam Zathang – Chairman Elect
Upa Patrict Savang – Secretary
Rbt Ngunkhar – Asst. Secretary
Rbt MC. Thanghninthang- Fin. Secretary
Upa Suithang – Treasurer
CALVARY Kohhran te hi Saiha leh Lungleia an awm lain MIzo hla an thiam loh avangin Lai twang Pathian an lo biaka, a hrana an inkhawmchu anlo hriatthiam hlawm loh avangin Lai District khawpui Lawngtlai hi rawn panin Lawngtlaia lo awm hmasa ten en in rawn khawmin alvary Kohhran hi dinin a hmasa berah Pu Hrangkhuma inah an inkhawm a, a vawi hnihna chu Pu Thangzuala inhnuaiah hawhin an inkhawm a.
Tin, a vawi thumna chu tuna DakIn hmun hi ala ruah lain hawhin Maurap In an sa a. Chu Maurap In chu Thliin a tihchhiat avangin Pu Thangzuala In hmun chu Rs 40,000/- (singli) in an lei a, Tuna an Biak In hi an lo din ta a ni. Miin luah leh inhlawhfa chawpa eizawng an ni nain, Lairam Isua Krista Baptist Kohhran ah hian thawhhlawk tak Tualchhung Kohhran pawimawh tak an ni.
An Kohhran lo pawmtu leh Fellowship a lo hawnsak tu chu Lairam Isua Krista Baptist Kohhran niin Dt:25.10.1992 ah Rev Th. Vanlalzauva leh Upa Hniartura te an ni.
Tunah chuan Local Church puitling tak a lo ni veta a, In 60 vel an ni a member 230 vel an lo awm ta a ni,
CALVARY AH AN TAN A TUAR TAWH VANGIN

MIZOTE LEH KRISMAS By Rbt. Lalmaka Tluangneh

Krismas hi kum tin khel lovin kan hmang thin a; amaherawhchu eng tihna nge a nih a, eng tiklaia hman tan nge tih leh khawi ramah nge an lo hman tan a, engtin nge kohhran hmasa ten an lo hman tih hi tam tak chuan kan hre lo chang ni lovin, ngaihtuah pawh kan ngaihtuah ngai lo mai thei.

Krismas tih chu Krista pian lawmna emaw Krista pian hriatrengna tihna a ni a. A hun leh ni tak erawh hriat a harsa khawp mai. Clement of Alexandria (AD 200) chuan, Lal Isua pian ni chu May 20 a ni e, a ti a. De Pascha Computes (AD 243) chuan March 28 a ni, a ti ve thung. Hippolitus (C 170-C 236) erawh chuan Dec 25 a ni, a ti a. Hriat dan leh ngaihdan tam tak zingah Dec 25 chu dik deuh berin a lang. ( A dik chiah a ni kan ti dawt ngamlo na a; AD 354 khan Pope Liberius-a hoin Rome-ah an lo hmang tan a ni tih erawh hriat a ni.]

December 25, krismas ni atan a hman a ni hi thenkhat chuan an duh lo hle a, a chhan chu Mithra betute kut ropui tak ‘Sol invictus’ Ni (Pathian) kut ni a ni a, Ni (Sun) betute kut ni kher kher Krismas ni atan a hman chu a ni thei love an tih vang a ni.

Amaherawhchu, kan ngaihtuah tel tur chu hei hi a ni.Ni (Pathian) kut ni a nih vang ringawtin ni chu kan bia tihna a ni lova. Jehova chu engkimtithei a nih ang ngeiin Ni (Sun God) chungah a leng a; hneh theih loh (invictus)te hneh theih loh a nih avangin a chungnunzia lantir a, hemi ni ngeia a piancham kan lawm hi a dik a ni. A thuhrimin ni(date) hian kawngro a su ber lem lova, chuvang chuan kan buai tur ni pawhin a lang lo. Hnehna ni, hnehna kut a ni tih kan hriat tlan a tha awm e.

Sawi tawh ang khan Krismas kan hman tan kum chiah hi hriat a har hle a. Rome Bishop pahnihna, Telesphorus chuan Bishop a nih laiin AD 137 khan Krismas hman dan tur a siam/duang chhuak a. (Chumi avang leh puhmawhna dangte avangin an hek a, martar-in a thi ta a ni. ) Tin, AD 300 khan Krismas dar hmasa ber chu Bishop Paulinus chuan Italy ram Nola, Campino khuaah a vua a, hengte hi Krismas chanchina hmasate chu an ni mai awm e. Hei hi calendar hlui tak, Rom lam chhuak Philocalian Calendar 336 AD chuan a nemnghet a ni.

A hman tan kum chu a enga pawh lo ni se, Krismas hi khawvel hian a buaipui a, a ur nasa a, a uarin a urhsun em em a ni. Sakhaw hrang hrang zuitute hian kut chi hrang hrang kan nei theuh hlawm a. Mahse, krismas aia huhang ngah leh lawm hlawh hi a awm lo. Hei hian kan Pathian ropui- zia leh chungnunzia a tarlang chiang hle in a lang.

ZORAMAH: Kan pi pute hrenpereng kaih a, siapsuap leh hnawkhal nen, thingbul, lungbul an la belh lai khan mite chuan:
‘A thilpek sawi hleitheih loh vang hian,
Lalpa chu engnge ka pek ve ang?’ tiin lu chum, ban chhum huamin ramthim ramro an lo su bur bur tawh a. Chumi zungzam rawn kal zel chuan March ni 20, 1891 khan he Zoram khawvel hi a rawn kap eng ve raih a. Chuta tanga kum sawmpahnihna, 1903-ah chuan zoram khawvel chanchina thil mak leh chhinchhiah tlak em em ‘Krismas hmasa ber’ chu Aizawlah a lo thleng ta a ni.

Hemi kuma Krismas an hmannaah hian Tirhkoh hmasa berte zing a mi Vanchhunga (a hnua Pastor ni ta) leh Lianphungate chu an unaute (kristian-puite) Sethluna awmho Aizawla (mas) hmang tura sawm turin buhseng laiin an kal a. Anni hian an va hmanpui leh hmanpui loh erawh chu hriat a ni lo.

Hemi tum hian puitling lam an tel tam lova, sikul naupang deuh vek an ni. Pu Zosaphluia (Rev. DE Jones) leh Pu Zosapthara (Rev. Edwin Rowlands) ten an hmanpui a, thu an sawi bawk. Bawng an talh a, mahse ruai an la theh lo. Tin, Biakin an la neih rih loh avangin Hmeichhe sikulah an inkhawm mai a, an la zaikhawm rih lo bawk. Zaipawl pathum: tlangval zaipawl (Dala ho), tleirawl zaipawl (Chhinga ho) leh naupang zaipawl (Thanga ho) an awm a, ‘Mizo kan nih lawm ilangin’ tih hla sain an inel a, Pu Dala hoin lawmman an dawng.

Kum 1905 chuan Zosapthara rawtin thangthleng an kam a, an sava awhte thawhkhawmin vawk sum nga sa nen ruai an theh. Kum 1912 atang chuan zan lamah intihhlimna siamin lemchan chi hrang hrang an chhuah a, ruai siamin naupang hnenah chithlum mumte an sem bawk. Hemi kum vek hian Lunglei lamah pawh an hmang tan ve a ni. Kum 1914 vel atang chuan thingtlang lamah pawh an hmang chho ve zel a. Chuti ang chuan lo darh zau zelin tunah phei chuan kan hnam nunah nghet takin a bei ta. Kum 1919 a harhna a lo thlen tak atang khan intihhlimna chi hrang hrang leh lemchante chu bansan a lo ni ta a ni.

HLA LAM: ‘Khawmhma pal a er an ti, a er lehlo an ti’ tia kan pi pute er ngawng ngawng a, an suk tawrh tawrh lai khan leh hla, phuah zawh khalh an hlauh avanga ‘Our greatest poetess’ Pi Hmuaki, a nung chung meuha an phum hun laite khan kohhran hmasate chuan rimawi chikim remin Lal thar lo pianga chu lawmin zai hla an lo rem tawh a. A ni, Juda hruaibo-a awmte’n, ‘Aw, Jerusalem, ka theihnghilh che chuan………’ an tih dungthula Jerusalem khawpui, muslim ho kut atanga chhuah zalen tuma ralthuam famkim nen ke an pen lai te; ‘Chungnung berah ropui rawh se’ tia Isua pianna hmun ngeia zai hla an rem tlut tlut laite khan keini ho chu, amah Zikpuii Pa tihdan takin, ‘Khi-ah, khi-ah, kawlvalenchham, thim lal thuneihna hnuaiah’ kan la tal pawl mai mai rih a. Zing eng mawi tak chuan hnuhma a neih deuh deuh a, hma a sawn deuh deuh hnu chuan, ngaiteh! kan rin phak ngai loh leh mang lam pawha kan la man chhin ngai loh thil mak a lo thleng ta! Hebrai leh Grik finna chawhpawlh zira, chunglam thiltih theihnain a tirhna apianga kal tura a hrual zawite Pu Buanga leh Sap Upa chuan kum 1899 khan a awm ngai tih pawh kan hriat loh ‘Krismas hla’ min pe ta! Khai aw, en mah teh:
‘Sebawng ina a piang ta,
Ran chaw thlenga an muttir a,
Beram vengtuten an bia a,
Mifingten an lo be bok a.’
(Hla Bu (1899) chang 2-na)

Thil mak deuh mai leh chhinchhiah tlak tak chu Krismas, a rim a ra pawh kan la hriat hma hauh a a ‘hla’ kan lo nei hmasa tlat hi a ni. Hemi kum hi hawrawp kan neih (1894) atanga kum 5-na, Krismas hmasa ber hman hma kum 4-na a ni bawk. A thu hi a ze nek nawk viau na a, hmasa ber dinhmun a hauh avang hian a pawimawh em em a ni. (Min siamsak tute thlarau chu siamtu ang chhungah chawl mawlh rawh se.)

Kan sawi tak ang a thimna leh mawlna rama kan la chen lai a, rimawi chikim hmanga lal piang lo lawm tute ai khan kan krismas hlate hi a class a sang zawk emaw ni chu aw, a tih theih hial mai. Hemi chungchanga Prof. Siamkima Khawlhring(fam ta) tawngkam i lo ngaithla teh ang. “Kan Mizo krismas hla phuah tute hian an phuah chhan leh changthlan te hi an hmu chiang hle hlawm bawk a. Hnamdang krismas hla kan hriat phak leh lar deuh deuh te nen pawha khaikhin hian kan krismas hlate hi a duai bik lo hle a ni. Silent Night tih phuahtu hian Bethlehem dai vel hi ral khat hnai deuh atanga thlirin a phuah niin a lang a; O come, all ye faithful (Ringtu zawng zawng te u) tih phuahtu hi chuan Bethlehem lam pan tur leh lal fapa piang chu fak bawk turin min kohkhawm a tum a. Zopa ngaihtuahna erawh chuan, Sappui mingo ngaihtuahna a leh khalh emaw tih mai tur a ni, Bethlehem thlen chu sawi loh, a dai bul velte pawh fang velin
‘Aw, angelte chu lo zai nawn leh se,
Bethlehem hmun dai khawhara ka awm lai hian’, tiin alo awm hman reng a ni’(Zalenna Ram Page-132)

Tin ngaiteh, heti hi a ni a. Sappui miril hote Bethlehem lam hawi tura an insawm mek laiin mipakhat, a hming Selbawnga thalbe atanga lo chhuak Zaliana, fahrah leh pisil avanga Patea an tih chu retheih leh fahrah vanga kum 35 lai mai Khawbung lal, Lalbika vanlung ura awm mah nise, Lal lo pian chhan a hriat chian em avang chuan:
‘Hmana pi leh pu ten an hmuh phak loh,
Saron par tlanin kan leng e’, tiin engthawl em emin
Saron par tlanin a lo leng der der a. Lal Isua pian zan chuan Bethlehem dai bul vel chu hrutin a lo fang vel a. Angelte leh Berampute chu biain a lo ti-ti pui mawlh mawlh a:
“Han thlir teh u, Angelte u,
In lawmlai Lal Isua.’
“Cham rih ula, Berampute,
Hmun khawhar kalsan s’u.”
Chu chu a la duh tawk mai lova,ran in kawt (kawngthar)- ah chuan dingin nausen en tura lo kalte chu lo chiau-auin a lo bia a. Nausen chu a lo kawhhmuh hlawm a:
‘Bawng In tlawma ka Lal riangvai tak saw,
A chun riang Marin a chawi e’.

Tin, chumi ram vekah chuan Zasiama an tih chu a awm bawk a. A ni hi chu Patea angin a tuan rang tawk lo emaw a nau deuh a ni mai thei. Isua pian zan chuan Bethlehem dai hmun khawharah chuan a lo awm ve hman lova; angel-ho zai chu ngaihthlak ve chak em em mahse a ngaithla ve hman lo. Zan dangah chuan, ‘bei nge sei run dung’ tiin a lo chang ve khar mai a. Angel-ho chu zai leh ngei se tiin duhthu a lo sam a:
“Aw, Angelte chu lo zai nawn leh se,
Bethlehem dai hmun khawhara ka awm lai hian.’
Kan sawi tawh ang khan hnam dang krismas hla phuahtute chuan Isua pian dan leh Krismas hman nachhante chu sawi ve bawk mahse, Bethlehem thlen chu sawi loh, pan turin an insawm laih laih chauh a ni a. Thenkhat chuan ralkhat atangin Bethlehem chu an thlir ve a, thenkhatte ngaihtuahna erawh chuan America khawmualpui pawh a pel meuh lo.

Chutih laiin kan Mizo Krismas hla phuahtute ngaihtuahna chuan kil tin kil tang hrutin,hmun tin ram tin a fang a. A changin Bethlehem tual laiahte lengin khualbuk neitu an hau va; Berampute kal liam mai tur chu la cham rih turin an chelh bawk a. A chang leh ‘ usher’ ah te an tang thul. An fakna hla sak te chu khawvelah hian khat vek se an ti a; mi zawng zawng an fak hla sakpui turin an sawm a; tlang leh tuifinriat chenin an phut a ni. An hmuh ang leh hriat ang chu la hre velo leh hmu ve lote hriattira hmuhtir an chak em em a, an sawm a, an kar hial a:
“Aw tunah hian i kal ang u;
Hmun khawhar lam chu i pan zel ang ‘.
Chu chang ni lovin Krismas hman dan[tur] tha ber kawhhmuhin min hrilh a:
“Ka thinlung ram Kaisar Lalnaah hian
Bethlehem tlangpui rawn din la,
I tan ranthleng rawn hung leh la,
Tah chuan lo cheng ang che”.
Kan sawi hmaih phal hauh loh tur chu, kum 1885-a Sawleng a piang, kum 6 mi lek a nih laia Tuirini lui lung nala a tawlhthluk avanga thimin a damchhung zawnga a tuam tak hlen tak; mahse khua hmulo chung pawha mahni ar thliarhrang ngat thei; sa awh har tak Sanghar pawh 50 lai awk thei ngat, Mizorama Salvation Army Corps Sergeant Major hmasa 3 te zinga pakhat, kan hlaphuahtute zinga hnam dang laka uire lo ber tih hial tlak Laithangpuia, kum 1937 a ‘Vanruai ropui kil’ tura ‘Thihna Jordan kai’ ta kha a ni. Ral do reng rengin a buaia, naupiang pawh a lawm ve hman meuh lo niin a lang. Mahse, mi lungleng thei mi a nih avangin hunpui inher vel hian a nunah nghawng a nei nasa hle a. Kum bul atanga a hun lo hman tawhte chu a chhuikir neuh neuh a,kum a’n hlui mai tur chu ngai em emin a thlir vawng vawng a. A insum zo ngang lova; hun chu mihringah chan(personify) a be mawlh mawlhin:
“Kumsul lo vei kan nun mawi leh hun tha,
Hmanlai in chang ta dawn maw ?
Tinkim kan dawn khawlin,
Awmkhua in tihar ngei”.
Chutah mai chuan a la inhrithla zo lova, a ui ngawih ngawih a, bana chelh hial a duh a; mahse chelh din chi a ni silo, vial ngawl ngawlin ti hian a’n chhamchhuak leh a:
“Theih zawng ni se hun lawmawm ka vuan tur,
An inherliam ta siau va,
Nunhlui ngaiin kan her,
Hmanlai kan ti vawng vawng”.
A ni, mihringte hi nunhlui ngai hian kan her a, kan vial ngawl ngawl a, hmanlai kan ti vawng vawng thin theuh a nih hi maw!

Mahse, Laithangpuia nihna (zia) chu chutah chuan a tawp lova, a famkim hek lo. Beidawnga indawm kun reng chi a ni lova; mi huaisen, raldo mi a ni kan tih kha. Kum lo thar tur, khawfing chat laia ni zung lo lang raih chu a hmuhin chibai bukin a lo ‘Welcome’ a:
‘Kan nghah kumthar lawmawm chu a lo thleng,
I zai ang hlim takin aw’ a ti te te a,
‘Kan fakin kan lawm che,
Nang hun leh kumthar lawmawm’, a ti zui a;
‘Hnam tin tan hun mawi tak,
Lenkawl ni a lo chhuak’ ti meuhin a lo lawm a ni.
Kumthar hman dan tur min kawhhmuh dante hi han en teh:
‘I zai ang hlim takin aw,
Nunhlui ngaih a sawt lo,
Kan hmalam i thlir ang’.
Ni e, nunhlui ngaih hi a sawt lova, kan hmalam, kan hmabak hi kan thlir a ngai a ni.

Heti taka kan krismas hlate a san nachhan nia lang chu, ‘A chhandamna hla, sap-hote phuah tirtu Pathian bawk kha a ni, Mizote phuah tirtu pawh hi’. (RL Kamlala, Editor hnena lehkhathawn : Tun lai, March 1962) tih hi niin a lang.

Hla tha reng reng chu a phuahtu ta bik ni lovin, mi zawng zawng ta, kan intawm tlan vek a ni a. Hla tha chuan a zirtu emaw a satute film kan ena thil chiang taka kan hmu ang hian kan hmaah chiang takin hlimthla a rawn hung a, min entir a, suangtuahna ramah min chentirin chenna ngai loh ram min fantir thin. Chu chuan a changin hlim em emin min lamtir a; a changin lungchhe vankaiin min tahtir a, a chang leh min nuihtir thin bawk. Hla phuahtute hi an va ropuiin an va hlu tehreng em!

Kan hlaphuahtu: Patea, RL. Kamlala, Suakliana, Zasiama leh Rokunga (1920-1950 inkar chauh kan chhui a) te thlen chin hi a sangin a thuk em em a; an tello chuan zaikhawm a nuam lova, urlawk atanga atiak thleng mai hian kan che thei lova, kan tlei thei thlawt lo a ni. He khawvelah chauh pawh ni lo, van kawtthler mawiah ngei pawh khian kan hlate hian hnam dang hla chu khumin ka ring thin a; Van Lalber ngeng pawh khi a chhun zawk ngeiin ka ring thin.

He khawvel hi inher zelin hunte chu lo danglamin lo inthlak thin mahse, Mizo kristiante awm chhung chuan heng kan hlate hian chuai ni a nei lo ang a, daih ni a nei hek lovang. An hlu tulh tulh anga, an la hlu zual zel dawn a ni, ‘a in mite chuan uaiin chu a rei apiang an duh si a’.

April Thla chhung NEWS

* Lairam Isua Krista Baptist Kohhran hnuaia Distance Bible School (DBS) chuan Dt. 29th -31st March. 2016 chhung khan II & IV Semesters ten Exam an nei. Distance Bible School Exam Centre hi hmun li (4) ah neih a ni. A rualin Exam Centre hrang hrangah exam hi buatsaih a ni.
* Dt. 1st April. 2016 zirtawpni khan Lairam Isua Krista Baptist Kohhran, Kum 2016 – 2019 chhunga Assembly hruaitu tur thlan tharte Charge inhlanna neih a ni. Hruaitu thlan tharte hi Rev. C. Hrangzuala General Secretary, Rev. B. Zazawna Lai, Associate General Secretary leh Rev. Th. Vanlalzaua, Associate General Secretary te an ni.
* Lairam Isua Krista Baptist Kohhran, Chandmari Pastor Bial Lawngtlaite chuan April 2 -3rd . 2016 Pathianni hmangin Bethel Local Church-ah Sunde School Meet neih a ni. Hetah hian bial Sunde School hruaitute atangin Sermon ngaihthlakna leh inzirtirna te neih a ni.
* March 31 – April 3, 2016 chung khan Lairam Isua Krista Baptist Kohhran, College Veng Pastor Hmeichhe Pawl Tawngtai Inkhawmpui Chawnhu Local Church, Biak Inah an nei. Hetah hian Speaker atan Rev. C. Hrangzuala, General Secretary chu hman a ni.
* March 27, 2016 Pathianni khan Lairam Isua Krista Baptist Kohhran ah member thar mi 45 kan nei. Chamdur Project ah Chhungkua 9, Member 38 (Upa 2 leh Rbt 3) kan nei thar a, Tin, Vathuampui ah chhungkaw 1, member 7 min pe bawk a ni.

MEETING
* Lairam Isua Krista Baptist Kohhran, Nomination Committee Vawi 88na chu April 4, 2016 thawhtanni khan Assembly Committee room ah neih a ni. Assembly in alo rel bawihzui ngaite bawhzuina dan tur ngaihtuah leh sawiho na neih a ni. Administrative Secretary, Bualpui (NG), Aizawl leh Bungtlang (S) a awm turte Charge inhlan hun turte ngaihtuah a ni. Kum 2016- 2019 chhunga Head of Department, Fellowship Secretary leh Shillong leh Delhi a Chaplain turte leh Coordinators ruatna neih ani bawk.hetiang hi an siam rem a ni.
1. Medical Superintendent – Dr. B. Zonunsanga
2. Office Superintendent – A. Lalthanfala
3. Finanace Manager – Rev F. Zionvarmawia
4. Pastoral & medical Coordinator – Rev S.L. Lalpuiliana
5. Secretary, LIKBKHP (Promotor KNP)- F. Vanlalkimi
6. Secretary, LIKBKTP & Comm.Coordinator- Rev V. Suikharliana
7. Mission Coordinator – Cz. Rammawipani
8. Social Mission Coordinator – Rebecca Lalhmangaihzuali
9. Christian Education Coordinator – B. Lalnunfeli
10. Assistant Manager, LCMC – V. Lailiankima
11. Chaplain
Delhi – Rev Varrosanga
Shillong – Rev A. Khawlrimawia

* Lairam Isua Krista Baptist Kohhran, Pastoral Committee Meeting vawi- 105na chu April 5, 2016 thawhlehni khan Assembly Committee Room-ah Upa Zahranga, Assembly Chairman Kaihruaina hnuaiah tluang taka neih a ni. He meetingah hian Bial thar Assembly in alo siam Mampui Pastor Bial tur hawn hun tur atan April thla chhung ngei a hawng tur a tih a ni. Pastors’ Seminar or Retreat neih hun tur te leh Pastor Posting & Transafer sawihona leh ngaihtuah a ni. Pastor Posting & Transafer hi hetiang hi an awmna hmun tur a ni ang.
1. Aizawl Pastor Bial – Rev. C. Lalawmpuia
2. AOC Pastor Bial – Rev. H. Lalsangliana
3. Bualpui (Ng) Pastor Bial – Rev. C. Thangzuala
4. Bungtlang ‘S’ Pastor Bial – Pro. Pastor Fc. Lalmuanpuia
5. Chandmari Pastor Bial – Rev. Dr. L.H. Lalpekhlua
6. College Veng Pastor Bial – Rev. Tc. Lalsanghmuna
7. Diltlang Pastor Bial – Rev. Malsawmdingliana
8. Lungpher Pastor Bial – Rev. V. Lalhmingsanga
9. Lungtian Pastor Bial – Rev. T. Vanlaldinpuia
10. Lungzarhtum Pastor Bial – Rev. Tc. Lalhunropuia
11. M. Kawnpui Pastor Bial – Pro. Pastor K. Lalchamliana Lai
12. Mampui Pastor Bial – Rev. Zadingluaia Chinzah
13. Ngengpuitlang Pastor Bial- Rev. Henry KC. Zathang
14. Paithar Pastor Bial – Rev. F. Lalringliana
15. Saiha Pastor Bial – Rev. H. Lalhmangaiha
16. Sangau East Pastor Bial – Rev. V. Danchungnunga
17. Sangau West Pastor Bial – Pro. Pastor V.L. Nghaksanga Khenglawt
18. Sihtlangpui Pastor Bial – Rev. A. Vanlaldinpuia
19. Tuithumhnar Pastor Bial – Rev. L.H. Lalliansanga
20. Vawmbuk Pastor Bial – Rev. Michael Rualzakhuma Chinzah
21. Vengpui Pastor Bial – Rev. Lalrinawma Bawitlung

* April 6, 2016 Nilaini khan Lairam Isua Krista Baptist Kohhran, Medical Board Meeting vawi- 51na chu Upa Zahranga Assembly Chairman kaihhruainain Assembly Committee room ah neih a ni. He meeting ah hian Lairam Christian Medical Centre (LCMC) Building sak chhunzawm dan tur ngaihtuah a ni.
* Lairam Isua Krista Baptist Kohhran, General Administrative Committee Meeting vawi- 90na chu Assembly Committee roomah April 7, 2016 Ningani khan neih a ni. He meetingah hian LIKBKHP, Project Rescue Home chungchang te leh Administrative Secretary, Bungtlang (S) a Office hawn hun tur leh Office thil mamawh te sawiho na leh thlirho neih a ni.
* Lairam Isua Krista Baptist Kohhran, Mission Board Meeting Vawi- 85na chu Assembly Office ah April 8, 2016 Zirtawpni khan Assembly Committee Room ah Upa Zahranga Assembly Chairman kaihruaina hnuaiah neih a ni. Hmachhawp tamtak rel niin langsar zualte chu Assembly in a lo passed tawh Tawngtai Inkhawmpui neih chungchang te leh Comprehensive Home Mission School, Nghalimlui chu Higher Secondary School a hlankai te leh Revival Team Speaker recognition pek chungchangte sawiho na neih a ni bawk.
* Dt. 5th April. 2016 Thawhlehni khan Lairam Isua Krista Baptist Kohhran, Assembly hruaitu thlantharte chuan Chief Executive Member(CEM), Lai Autonomous District Council (LADC) Office, inkawm khawmna neihpui a ni. He inkawmkhawmna ah Rev C. Hrangzuala, General Secretary, Lairam Isua Krista Baptist Kohhran chuan tawngtaina leh Thuchah a sawi a, LADC hruaiturte pawh an tel tha hle a ni.
* Lairam Isua Krista Baptist Kohhran, Naupang Pawl Vocational Bible School (VBS) chu Dt. 9th – 10th April. 2016 Pathianni hmang hian Peniel Local Church, Lawngtlai-IV ah neih a ni. Pastor Bial hnih College veng Pastor Bial leh Chandmari Pastor Bial te inkawp a he hun hi hman a ni. He tah hian intihsiakna te neih niin “Kangmei laka inven dan” tih leh “Zuk leh hmuam thatlohna” tih thupui hmang in inzirtirna neih a ni bawk.
* Lairam Isua Krista Baptist Kohhran, Moria Local Church te chuan harhna an dawn atanga kumkhatna April 15th. 2016 Zirtawpni khi niin he ni hian Ruai nen ropui taka Pathian hnenah Lawm thusawina neih a ni ang. Crusade chhunzawm a ni anga Speaker atan Rev. H. Lalhmangaiha, Bialtu Pastor hman a ni ang.
* Lairam Isua Krista Baptist Kohhran, General Administrative Committee 70: B. 6 in Mawhphurhna apek angin, Child Development Centre (CDC) Lawngtlai Project Advisory Team Meeting Vawi 10na chuan Lalnunpuii D/o Lalchhawnmawia, Hermon, Lawngtlai leh Judy Zothanmawii D/o J. Lalthanpuii, Bethesda, Lawangtlai Vengpui te chuan Worker atan a la thar a ni.

* Lairam Isua Krista Baptist Kohhran, Hmeichhe Pawl Office Bearer thlan tharte chu General Administration Committee vawi-90na chuan a pawmpui a, Isua Krista Baptist Kohhran, Central Hmeichhe Pawl Adviser atan Upa H. Alchunga, Moria pek an ni bawk.
* Lairam Isua Krista Baptist Kohhran, 2015 – 2016 Annual Audit chu Centenary Hall, Lawngtlaiah Tahrik 12 – 13th April. 2016 khan Lairam Isua Krista Baptist Kohhran, Assembly Auditors te leh Convener, Upa K. Liankhuma ho a tluang taka Audit hi neih a ni.
* Lairam Isua Krista Baptist Kohhran, Moria Local Church te chuan Tahrik 15th April. 2016 zirtawpni khan harhna an dawn atanga kum 1na chu Chawimawina ni atan an hmang. He mi ni hian Ruai nen ropui takin an lawm. Speaker atan Rev. H. Lalhmangaiha, Chandmari Pastor Bial chu hman a ni. 14th April. 2016 ningani zan atang khan Crusade a hun hman niin Pathianni zan hian an tawp ang.
* Lairam Isua Krista Baptist Kohhran, Shalom, Local Church, Thingkah chuan Dt. 6-13 April. 2016 chhung khan Crusade an nei. He Crusade ah hian “Pathian Biathli Puangtu Team” Speaker Upa K. Liansang leh ateam te hman an ni.
* Rev. C. Hrangzuala, General Secretary, Lairam Isua Krista Baptist Kohhran chu Lamkang Khunoa (LNBA) ten an khaw Centenary leh Kristianna Golden Jubilee lawmna tura Speaker & Chief Guest a an sawm ang in April 13th. 2016 Nilaini khan Lawngtlai chhuahsanin Lamkang Khunoa ah a kal. April 23rd . 2016 Inrinniah Lawngtlai a lo thleng ang.
Rev. Th. Vanlalzauva, Associate General Secretary i/c Service, Lairam Isua Krista Baptist Kohhran chu April 13th. 2016 Nilaini khan Delhi a Charge inhlanna nei tur leh thil pawimawh buaipuiin Delhi-ah a chhuk. May 10th.2016 Thawhlehni khian a lo let leh ang.
Linda Lalnunpari Fanchun, Social Worker, Lairam Children Adoption Centre, Lawngtlai chu April 13th. 2016 Nilaini khan Shillong ah Regional Meet a tel turin a kal. April 21th.2016 khian a lo let leh ang.
* Assembly Executive Committee vawi 57-na in a remtih angin Pi H. Lalrinsangi, Assistant Finance Manager chu Bachelor of Divinity (B.D) zir turin Assembly Office-a a hna atangin Dt. 14th April. 2016 khan released a ni.

Lairam Isua Krista Baptist Kohhran. NEWS

*          Lairam Isua Krista Baptist Kohhran, Lawngtlai Chandmary Pastor Bial te chuan Dt 29th Sept– 11st Oct. 2015 chhung awh tur Salvation Camping an buatsaih. Speaker atan Pu Malsawmthara, Dinthar leh na Team Speaker hman a ni.

*          Lairam Isua Krista Baptist kohhran, Hmeichhe Pawl te chuan Pastor Bial tinah Seminar neih an tum a ni. He hunah hian Pi Rebecca Lalhmangaihzuali, Co-ordinator Social Mission ziak “Hmeichhia mawhphurhna leh chanvo” tih zir ho a ni ang. Central Hmeichhe Pawl Executive Committee Member te fehchhuak in heng hmunah te hian Seminar huaihawt a ni ang. Bungtlang ‘S’, Ngengpuitlang, Aizawl, Vawmbuk, Lungpher, Bualpui ‘NG, Lungzarhtum, College Veng Lawngtlai, Saiha, leh Chandmary Lawngtlai Pastor Bial ah neih mek a ni.

*          Dt 2nd Oct. 2015 zirtawpni atang khan Lawngtlai Vengpui Pastor Bial Naupang Pawl te chuan Inkhawmpui Centre Church Lawngtlai Bazar ah neih a ni a. Speaker atan Rev. A. Vanlaldinpuia hman a ni. Dt 4th Oct. 2015 Pathianni zan hian he inkhawmpui hi a tiak ang.

*          Texas Baptist Hunger Offering in Baptist World Aid kaltlanga an rawn sponsor, Lairam Isua Krista Baptist Kohhran hnuaia Rural Health Development Project (RHDP) chuan thingtlang zawk atang a damdawi leh inenkawlna hmun tur hmun hrang hrang Bungtlang ‘s, Vawmbuk, Lungtian leh Siachangkawn ah te a buatsaih tawh a. Dt 25th Sept. 2015 khan damdawi zawrhna centre panga-na chu khan Niawhtlang ah Rev T.C Lalsanghmuna Associate General Secretary i/c Service in a hawng. He Project changtu Rev B. Zazawna Lai, Associate General Secretary i/c Medical hnen atang a thu dawn dan in he project hi kal pui zel tum a ni a, tunah hian Centre parukna (6) tur pawh hawng leh tur a ruahmanna kal pui mek a ni, ati

*        Tin, Nimin 27th Sept. 2015 Pathian ni chhun khan Lairam Isua Krista Baptist Kohhran chuan Probationary Pastor pahnih lakluhna (Induction Service) Bethlehem Lawngtlai – III Biak in ah an hmang. He Induction Service hi Upa A. Taichunga Assembly Chairman in a kaihruaia, Rev Dr. LH. Lalpekhlua, General Secretary in lak luhna hun a hmang. Assembly Choir ten he Induction service ah hian an zai bawk. Rev B. Lalrinawma, Finance Manager in Malsawmna in inkhawm hi a tin.

 

*             Lairam Isua Krista Baptist Kohhran, Central Hmeichhe Pawl, Executive Committee vawi – 85na in a lo rel Pastor Bial tin a Seminar nei tura a tih bawhzui in athawhkhatna atan Dt 2nd – 4th Oct .2015 chhung hian Pastor Bial Sawm (10) ah neih a ni. He Seminar ah hian HMEICHHIA TE MAWHPHURHNA LEH CHANVO’ tih Pi Rebecca Lalhmangaihzuali, Coordinator, Social Mission Department, Lairam Isua Krista Baptist Kohhran ziak chu zir ho a ni. Resource Person atan LIKBK Central Hmeichhe Pawl atang inruat in hun hman a ni. A thawh hnihna hi November 13rd – 15th chhugnah neih leh tur a ruahman a ni bawk.

*          Lairam Isua Krista Baptist Kohhran rorelna sangber Assembly 2015 in a lo rel angin, September 30, 2015 hian Rev Dr. LH. Lalpekhlua, General Secretary Chuan Lawngtlai District-a a vawi khatna atan CHARITY SHOP a hawng. He Charity Shop hi Lairam Isua Krista Baptist Kohhran hnuai a Social Mission Department hmalakna niin, miharsa zawkte’n thawmhnaw leh inchhungkhur mamawh chi hrang hrang, man tlawm tak a lei emaw atul dan azira a thlawn hial pawh a dawn theihna hmun atan buatsaih a ni. He in Charity Shop hawnna inkhawm hi Rev TC. Lalsanghmuna Associate General Secretary i/c Service in a kaihruai a, Rev B. Zazawna Lai Associate Genral Secretary i/c Mission in thusawina tawi a nei bawk. He hmun hi mi tlawmngaite leh Tualchhung Kohhran hrang hrangte thilpek atanga buatsaih a ni. A hmun hi Kalvary Tualchhung Kohhran Biak In hnuai, Chanmari, Lawngtlai- IV a ni. Mamawhtu apiangte’n an pan theih turin chawlhkar khatah ni hnih Thawhlehni leh Zirtawpni ah te hawn tur a ruahman a ni.

*          Lairam Isua Krista Baptist Kohhran, Assembly in kum tin a alo tin thin ang in, kum in 2015 Half Yearly Audit chu Dt 6th – 7th Oct. 2015 khan tluang taka neih zawh a ni.

*          Lairam Isua Krista Baptist Kohhran, Naupang Pawl, Lawngtlai Vengpui Pastor Bial te chuan Dt 2nd Oct atang kha inkhawmpui leh intihsiakna te neiin Oct, 4th Pathian ni zan khan tluang taka zawh a ni.

 

 

News from Mission Department

  • The 81st Mission Committee of the Lairam Jesus Christ Baptist Church held on June 12, 2015 appointed Marina Malsawmtluangi, d/o Mankunga, Council Veng
  • On May 24, 2015 (Sunday) the houses of two new converts in Sumsilui, Lawngtlai district was completely burnt down. Donations amounting to Rs. 46,978/- was received from Local Churches within Lawngtlai Town in aid of the two families.
  • Five new converts were baptised in June, 2015 in Myanmar Field
  • Construction of Church building is started in Odhisa Field
  • The Revival Committee decided to have “Revival Campaign” in all the pastorates during the year 2015-2016.
  • Revival Campaigns are being held in many Local Churches under Lairam Jesus Christ Baptist Church. We rejoice that the church is experiencing God’s visitation through Revival.
  • Rev. B. Zazawna Lai, on behalf of the Lairam Jesus Christ Baptist Church went to Aizawl and signed Memorandum of Understanding with Elim Ministry for Ministry in Myanmar

Regional Church Councils to be opened in Bualpui & Sangau

As per the resolution of the 16th Assembly of the Lairam Jesus Christ Baptist Church Assembly, the Bualpui Regional Church Council will be inaugurated on June 7, 2015 at Bualpui Ng. It will be inaugurated by Rev. B. Zazawna Lai, Associate General Secretary i/c Mission. On 9th June, 2015 the Sangau Regional Church Council will be inaugurated bu Rev. TC Lalsanghmuna, Associated General Secretary ‘Service’.

Lairam Child Adoption Centre Building inauguration

Lairam Child Adoption Centre building at Lawngtlai will be inaugurated today by Elder A. Taichunga, the Chairman of the Lairam Jesus Christ Baptist Church Assembly. Lairam Child Adoption Centre is a Specialized Adoption Agency (SAA) approved by the Ministry of Women and Child Welfare under the Juvenile Justice Act 2000 and its Amendment Act 2006. The centre was inaugurated on April 2011.