Pawl hruaitu leh mipuite dinhmun bihchianna.. By : Zirmama pa Chandmary, Lawngtlai


Hruaitu:

Hruaitu tel lovin mihring kan khawsa thei lova, mi pahnih emaw, a aia tam emaw awmnaah chuan hruaitu an awm zel thin. Chhungkuaah te, pawl-ah te, kohhran-ah te, khawtlang–ah te, ram leh hnamah te hruaitu tel lovin engmah a tih theih loh. Hruaitu lovin hma a sawn theih loh a, hruaitu awmlohnaah chuan nun a buaiin thiltih a sáwt lova, hmasawn a harsa thin a ni. Mi bîk pawh ni lem lo, a chuha chuh tlingte hian mahni duh zawnga Pawl khalh a, a tirtu PATHIAN leh a hna aiin ‘mahni’ a indah pawimawh a. Thawh tur chin bi tuk insiamin fel taka hlen chhuah hi hna tlâk leh titha niin a inhria a, nihna hlen tháwkin a thaw ham ham tawh mai a ni. Hruaitu ni tura thahnemngaihna tak tak nei phâk lo, a chhehvélah a tlingtla ve mai a ni tih a inhre lo va. A beisei ber fakna tawngkam leh kut ben ri a hriat chu a nun chawmtu hlobet, ni a tlangsana vuai leh mai thin ang mai hi a ni. A tihthat ber cháng pawhin a hruai mipui/member-te hnungah a tlan ve hram hram chauh thin.
Hruaitu chuan a hruaite dinhmun a hre chiang em em tur a ni. Eng pawl leh sakhua pawh nise hruaitu dinhmuna ding, a fawng vuantu leh hnar kaitu ten mahni mi leh sa dinhmun an hriatsak loh hian thil pawi tak a thleng palh thin. Tin, hruaitu thlan leh ruat chungchangah hian fimkhur thiam a pawimawh hle a, hei hian pawl a tizahawmin a tizahawm lo thei bawk a ni. Ngaihtuahna fîm tak hmanga thlan(ruat) chhuah hruaitu chuan pawl tan hmasawnna leh tum ram (Destination) bakah, mimal zahawmna hial pawh a thlen thei bawk a ni. Pawl thenkhatah chuan hruaitu thlan(ruat) chungchangah hian mipui lam an fimkhur tawk loh avangin pawlin a chak loh phah hial thin. Pawlin a thuanawp phaha, mimal zahawmna pawh a tihniamin a tichhe tel bawk a ni. Hruaitu chu thusawi leh thiltihah a hun leh hmun thliar hrang thiam a ni tur a ni. Mahni thawhpui/rawngbawlpui te zahawmna leh dinhmun tichhe thei zawnga tawngkam chhakchhuah ching sawi tur an tam ta viau mai, heti ang mi hi hruaitu atan thlan/ruat loh a him ber.
Tum mumal tak neia midangte tanpui leh kaihruai tura mahni inpêkna hi hruaitu dinhmunin a kawh tum ber a ni awm e. Kan sawi tak angin hruaitu nihna leh mawhphurhna hi mi nazawng tán chelh ve tum ngawt chi a ni lova; mahni kianghnaia khawsa mipuite leh thawhpuite nunphung hrechiang tura mi inzir peih nih a ngai. Hruaitu te hi hruaitu ni tura piang an ni kher lo; tihhmasâwn ngai, inpêkna atanga hlawhtlin tum tlat, tlawm a ngaih huna tlawm ngam leh a harsa lai ber tawn ngam tura huaisen thei ni tura inbuatsaih an nih a pawimawh. Kohhranah ngat phei chuan a rawng kan bawlsak PATHIAN thu nung chhiara zirchiang peih leh a hruai mipuite aia activity hrang hranga tel tam tam, kawng engkima member-te aia hmahruai (advance) tlat thin mi ni thei se a tha ber.
Hruaitu tha nihna (leadership) nena kan ngaihpawlh fo thin, leadership ni silo, mahse inkungkaihna nei ve si a awm—Leadership nei tha tak, dinhmun pawimawha chuangkai silo an awm thei. Tin, dinhmun pawimawha chuangkai nazawng leadership nei tha an ni kher chuang lo bawk. Chutiang bawkin, mifel tak (personality nei tha) te pawh hruaitu tha an ni kher chuang lo. Kohhran hi mi mawng zang satliah te hruai that theih chi a ni ngawt lo. Tin, leadership hi lalna leh thuneihna a ni lo. Johana Bung 13 kan en chuan Lal Isuan a zirtirte ke a silsak thu kan hmua, hruaitu nihna chu intihlalna leh thuneihna lam nilovin, midangte rawngbawl sak hna a ni zawk.
Hruaitu dik tak leh chhawr nahawm ber chu hruaitu nih thlahleh lo, mahse chung lam Thlarau Thianghlimin loh theih lova hruaitu atâna a hlánkaite an ni. Paula hun lai atanga tun hun thleng hian rilru leh thinlung takzeta an dinhmun luah peih lo mihring Lalpa’n chanvo a pe ngai lo. Hruaitu nih thlahlel te hi hruaitu atan an tlâk (Qualified) lo va, hruaitu dik tak chu a inphahhniam a, a inpumpêk a: tin, Thlarauvin hruaitu dang a thlanchhuahte pawh îtsik mai lovin a zui mai hreh lo. Hruaitu tha chuan ruahmanna a siam tawh leh a thil tum te chu thil dang dangah a pakkaisan mai lo va; pawl tâna a thil tumah a ding ngam thin. Hruaitu tam tak chuan hei hi hre lovin thil dang tam takah ngaihtuahna leh beiseina hrang hrang an nei a, chu chuan pawl hmalâkna leh hmasawnna tur a tithuanawp hial a. Hruaitu dinhmuna ding chuan hun remchang a zawng thiam fo tur a ni.
Hruaitu tha chuan thiltihtheihna neih dân te, thuneih dan tâwkte leh hruaitu dinhmuna thil pawimawh te a hriain, midangte tân thiltihtheihna leh chakna a siamsak thiam bawk thin. Mi tam tak chuan hriatna, ruahmanna tha leh thil tithei tura midangte thuneihna neihtir an hlau thin, chu chuan pawlah hruaitu nihna an hloh phah hial a ni. Midangte tichak thei turin mahni kan intihchak thiam a, a hun leh hmun a zira zahawm, nelawm tak nihthiam te a pawimawh.
Mi tam tak chu hruaitu dinhmuna an din rual rualin mahni nihna leh dinhmun theihnghilh ta mai an awm thin; tin, pawl thiltum leh inkaihhruaina pawh hre ta lo sawi tur tam tak an awm bawk. He’ng ang hruaitute hian pawl mi leh sa duhdan leh ngaihdan lakna châng an hre lo va, an ngaihdân leh duhdânin pawl an kaihruaia chu chuan pawl a tidarh a, pawl chhungah khi(gap) siamin innghirnghona leh inkhelh tawnna hial a thlen thin. Hruaitu mawhphurhna hrang hrang zingah pawl leh a chhunga mipuite tihchak leh kaihhruai hi thil pawimawh leh hruaitu tinte tih mâk-mawh a ni awm e. Tin, mahni nihna leh dinhmun hriatchian leh thlir let thiam a finthlâk hle.
Hruaitu dinhmuna han din chiah hian mi tam tak chuan kawng engemawti zawng talin danglamna an nei nghal a – nungchang leh rilru sukthlêkte pawlin a mamawhdân a zirin an siam tha thin. Hruaitu fing chuan pawl lo kaihruai tawh thintute hnu-hma atangin siamthat ngailai leh chhawmzui tur a zir chiang hmasa zet a: chutiang chuan pawlah Mel-lung pawimawh tak a phunzui a, kawng hrang hrangin pawl chu bung thar a kaipui a, pawl chhung mipuite dinhmun siamthain hmasawnna lam a hawipui ta thin a ni. Nimahsela, mi thenkhatte erawh chu heti anga hruaitu dinhmuna an han din ve chiah hian mahni inthununna an tlachham a, thuneihdân tawk thiam lovin pawl leh mipuite an awp hlum hlauh zawk thin. Hruaitu hmasa te sûlhnu chhunzawm tur leh kalphung thara hmalâkna kalpuidân tur te ngaihtuahna lam aiin mimal hmingthat lâkna leh lansarhna lam an dap zawk a – pawl tan harsatna tam tak thlentuah an tang mai zel a, chu chuan mipuite inpumkhatna leh hmalâkna hrang hranga tanrualna tichhiain pawl dinhmun hmasa chu an tihnungtawlh daih ta thin a ni.
Hruaitu mi ngaihsân hlawh tak tak, tlâkhawlhna lian ber chu engkima ‘Ka, keimah’ (myself) tih thlák ve zenna hi a ni. Fakna ri hriat hi a nuam a, mi ngaihsan nih pawh hi thil thlakhlelhawm tak a ni e; nimahse Lal Isuan “Mi zawng zawngin an fak hunah che u in chung a la pik ang” a ti daih mai. Lár tum hi thil atthlâk tak, mahni intihmualphona thlen theitu a ni. Pathian rama rilru leh rorêl leh tihtakzeta thawktu chu lar tum lo mahse thuh-rûk tak tak theih a ni chuang lo. Pawl pakhata an hotupa ber chu a pension a, pawl chuan a tlakhniam phah hle maia, kum 20 chhunga a hruainnaah, amah mimal tha mahse a tlin tâwklohna lan chianna em em chu a aiawh/thachhang dawltu a chher chhuak lo hi a ni. Lal Isua chuan kum thum chhungin a thachhang dawltu tur a hnungzuitute a chher hriam hman a ni.
Tin, hruaitu a nihna chan leh mawhphurhna insem rual a harsatna lo lang ve thei leh, lo awm ve thei te chu – Kan luah tur dinhmun ni awm taka kan lo beisei ve rilrûk midangin an luah hian engtin nge kan ngaih thin? Mahni kan han inbihchian deuh hian hruaitu nihna atanga kan tlinlohna leh fel lohna kan in hmu ve fo thin em? Kan chak lohna lai mi dangten an rawn hmuh ve chiah hian engtin nge kan ngaih thin? tihte hi rilruin mahni leh mahni kan inzawh rilrûk a pawimawh fo. Hruaitu chuan hotu nge ka nih lal? Mipuite chunga leng nge ka nih mipuite rawngbawlsaktu? Hruaitu ka nihdân hian Pathian a tilâwm ang em? Tihte hi ngaihtuah nawn fo a tha ber.

Hruaitu leh mipui inlaichînna:
Hruaitu tha ni tur chuan mipui te nena inremna leh inlaichînna tha tak kan nei tur a ni. Kohhran hruaitu tana hna hahthlâk ber pakhat chu inlaichînna boruak tha vawn reng hi a ni ve thei awm e. Thil tum tihlawhtling tura kutkë ber chu mipuite an nih avangin tih phur, fuih, leh khalh kal reng an ngai a ni. Tin, mipuite inkara inlaichînna tha siam reng a nih loh chuan thawhhona a tha thei lo ang bawkin Pawlin hma a sawn thei lo. A tawpah hruaitu bawk sawisêl an ni leh thin. Dawhtheihna leh taihmakna a pawimawh hle a ni.
Mi tam tak tan pawl leh Kohhrana thil harsa tak ni thin chu dinhmun inanga kan dinpui, kan rawngbawlpuite chawimawi leh duhsak hi an har ber thin. Kan chunga mite emaw, kan hnuaia mite emaw hi kan îtsik ngai lem lo, kan terh phak deuhte leh kan chunga mite bawk hi îtsik an awl thin. Midangte aia chungnun duhnate, dinhmun tha bik luah duhnate hi thawkho kan nihnaa inlaichinna tichhetu a ni fo thin. Chuvang chuan hotu kan ni emaw mipuite kan ni emaw pawl leh kohhran in a hlawkpui theihna tur a nih chuan pheikhai rual taka tan kan lâk rual a, innghirnghona emaw harsatna emaw kan tawh pawhin zaidawh leh thuhnuai rawlh taka inhmangaih tawna kan thawhho a ngai a ni.
Hruaitu dinhmun hi a ropuiin a duhawm a ni. Hruaitu nih tum erawh a sual hran lo va; amaherawhchu, a dinhmun lai chauh thlâkhlelha hi a tha lova, a hruaitu nihna lai hi a pawimawh zawk a ni. Hruaitu nih tum dan tha chu hruaitu dik tak zia pu tura inbuatsaih hi a ni. Hruaitu atâna tlak mihring chuan nihna leh chanvo hranpa chelh lovin nei lo mahsela a hruaitu a ni tho tho thin. Hruaitu dinhmuna din vang ringawta intih lal lutuk te, âwl bik leh hahdam bik nih tum tlat hruaitu an awm hial thin; heti ang hruaitu neih palh hi pawl tan chak lohna thlentu a ni duh viau a, a pumpelh dan kawng awlsam tha ber ni a lang chu – Hruaitu dinhmuna a din hmaah pawl tan eng angin nge ke a pen a, hma a lak thin? A inpêkna a thûk em? tih member ten an zirthiam a pawimawh. Hruaitu thlanna neih anih dawnin hun kal tawha an dinhmun leh inpêkna te ngaihtuah let thiam a finthlâk ber. Henry Miller-a chuan, “Hruaitu dik tak chu hruai ngai lo; midangte tana kawng kawhhmuhtu a ni,” a ti ang hian hruaitu dinhmun chelh tur chuan mi hmangchang hria, insum thei, a hun leh hmun zira mahni insiamrem thiam, mi rinawm leh mahni hnû-hma ngaihtuah thiam nih a ngai.

Mipui/Member-te:
Hruaitu leh mipui/member-te dinhmun hi chuti the hluaia inthlau a ni lo, an pawimawhdân a inang reng a ni tih hi kan hriat fo a tha. Mipuite hi pawl awmtirtu leh hruaitu thlanga ruattu an ni a, a fawng vuantu ber an ni mah mah zawk awm e. Tin, hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni bawk. Kawng hrang hranga hma latu leh hmatheh tur chu mipuite atang bawka thlanchhuah an nih avangin kan hlutna hi kan hriat tlat a pawimawh. Mipui/member ten hruaitu thlan kan thiam chuan pawlin hma a sawn a, a chak bawk thin. Pawl tana biakrawn theih, ruahmanna siam leh hmalâkna kawng hrang hranga kan aiawh thlang theitu mipuite hian hruaitu thlandân pawh kan thiam a pawimawh.
Pawl mi leh sa (mipui) te hi hruaitute tana hruaitu pawimawh ber ber: kawng dik leh tha zawk kawhhmuh theitu tur zinga mi an ni tih kha thu hmasa lamah kan sawi tawh a. Hei hi thudik leh pawl hmel landan tichiangtu pawimawh ber pawh kan ti thei ang. Mipui/Member (Pawl mi leh sa) ten hruaitu an endan te, inpekdan leh hmalakna an kalpuidân a zirin hruaitu dinhmuna dingte chu an lang mawiin; an lang mawi lo thei a ni. Hruaitute hi kan aiawha thlan/ruat an ni tih avang ngawta duhna lam lama pawhkawi leh khalhkual mai mai tur an ni lo. Theih tawk leh tlin tawk nei ve tho an ni tih hi kan hriatsak fo a ngai a ni.
Mipui/member (pawl mi leh sa) te inpêkna a nasat zawh poh leh pawlin hruaitu tha kan nei mai zawk a ni. Hruaitu tha leh tha lo hretu chu mipui lam an ni a. Tu nge thlak ngai a; tu nge hruaitu dinhmun chelh zui tlak? tih te hi mipuiah a innghat mah mah zawk a ni. Mipui tanrualnaah chuan pawl a nuam a, hruaitute pawh an chak thin. Hruaitu dinhmuna dingte inkara thil fel lo leh inhmuh thiam lohna a awm chàng pawha zaizâptu tur chu mipuite bawk hi an ni. Mipui/member (pawl mi leh sa) te inkaraah thil fel lo a awm palh chuan hruaituteah a langchhuak mai thin, chu chuan pawl chhungah khi a siam a, mimala inhuatna hial a hringchhuak ta thin a ni. Eng pawlah pawh awm ila – pawl tana mi tha leh rintlâk nih hi mi tinte tana kan tih-mâk-mawh ber a ni.
Mipuite hi min hruaitu tur thlanga ruattute kan nih avangin pawl/Kohhran chhunga mimal tinte dinhmun pawh kan inhriattawn a ngai em em a ni. Kohhranah ngat phei chuan min hruaitu tur kan thlan dawnin heng tehkhawng (criteria)-te hi mipui ten a rûkin kan neih a ngai: Kohhran Programme, Activity hrang hrangah te, keimahni zawna rawngbawlna huangah kan aia inhmang tam leh tel tha te, inkhawm leh Sunday School ngaipawimawh, hnatlân nikhuaa chhuak tam a ni em? A rawng kan bawlsak PATHIAN thu hriatna lamah engnge a dinhmun, min zirtira thu tak lama min kaihruai theitu a ni thei ang em? Kohhran serhsang – Kohhran mi ten kan tih tur leh tih loh tur thliar hrang thiam leh ngaipawimawh a ni em? Mipui/member-te hmahruaitu nge anih a, an hnunga ke pen ve mai mai zawk? tihte thleng hian kan inhriatsak a pawimawh viau mai.
Mipuite kan fimkhur loh hian pawl leh Kohhran chu a kal sual fo thin. Pawl/Kohhran thenkhat hruaitu thlan leh ruat chungchangah thian tha, unau leh chhungkhat ang zawnga an kal avanga buai sawi tur an tam ta hle, hei hi pumpelh tum theuh ila a tha khawp mai. Tin, hetiang rilrupú kan lo awm anih chuan i sim ngam ang u. Kohhran ngat phei chu min dintu PATHIAN hi PATHIAN thîkthuchhia anih avangin kan fimkhur a pawimawh em em a, Kohhran duhdan leh serhsang ngaipawimawh lo, zu leh ruihtheih thil, eirûkna nena inkaihhnawih mihring chu hruaitu atan thlan loh leh ruat loh ngam a tha ber. Kohhran huanga hruaitu leh mawhphurtu ruat kawngah pawh kan duhtui a hun tawh takzet a ni. Kan PATHIAN hian baala hmaa thingthi ngai lo mihring a ngah lutuk tlat tih hi i haider fo lovang u. Tirhkoh Paula’n, “Zirtirna dik an ngaih peih loh hun a la thleng dawn si; an bengte a zat avangin anmahni duhzawng angin zirtirtute an hnenah an khawm zawk ang a, an bengte chu thutak lamah an chhungawng ang a, thawnthu lam panin an peng tawh ang. Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh,” ti a (II Tim. 4:3-5) Timothea hnêna a fuihna hi kan hriat nawn fo a pawimawh tak meuh meuh a ni.

Ngaihtuahzui atân….
1. Hruaitu kan thlan hian pawl hmangaihtu – pawl tâna mi tangkai, hmalâkna hrang hranga sûlsutu lo ni tawh thin leh pawl/Kohhran tâna mi hmingtha lo ni tawhte kan thlang thinin kan hria em? Nge, unau, chhungkhat leh thian thate zing atangin kan thlang mai thin zawk? Eng nge kan tehfung?
2. Kohhran hruaitu ni si, mipui/member-te hnunga kal ve satliah ringawt a awm theih ang em?
3. Kohhran hruaitu atân hian Pathian thu chhiara zirzui peih, zirtir thiam te; inkhâwm, Sunday School, zaikhâwm, Committee, hnatlâng leh Kohhran programme hrang hranga mi inhmang peih tak takte chauh hi thlang/ruat ta thin ila Pathian duhdân a ni mai lovang maw?
4. Zu, ruihtheih thil leh Kohhranin a pawm loh thildangte nena inkaihhnawih hruaitu atan kan thlang fo hi tha kan ti em? mawhphurhna pêk zêl chi-ah kan ngai em?
5. Mipui/member-te hian hruaitu atana kan thlan/ruatte dinhmun leh pawl/ Kohhran tana an activity hi kan thlír letpui thin; nge, kan thlang a kan duh tawk mai thin zawk?

CALVARY TUALCHHUNG KOHHRAN CHANCHIN TLANGPUI.. By V. Thangcheu

“Aw, tlangmawi CALVARY miten hmusit mahse, Tlang dang zawng zawng aiin kei chuan ka ngaina hle, Pathian thisen a luanna chu” tia kan sak thin hming chawia ding CALVARY Biak In leh he Biak In a inkhawm (lawi) thin te hian danglamna bik an nei a. He BIAKIN hi chhawng li tura din a ni a, a chungber chu la zawhloh a ni.A chhawng thumna torah hian Pathian Biak Inkhawm nan hman rih a ni. A chhanwg hnihna chu Room 2-ah then niin, Room pakhat zawk chu LIKBK Assembly-in CHARITY SHOP-ah hmanginnula fel tak Jessie Lalthanpui`n a nghak thin a ni.
Room pakhat chu CHHIN COMMUNITY INFORMATION CENTRE atan, The Ludia Project Implementing Committee-in a siam a, he hmun hi Pu V.Zirsanga, Executive Member LADC in 15.03.2012 kha a hawng a ni.
Tin, he Biak Ina inkhawm te hi miin luah hawh a awm deuh vek an nih avangin vanduaina, thihna an tawhin ruang thutpui nan an hmang thin a. Chulovah inhlawhfa leh sumdawng/awmna neilo thite an awmin ruang zalh nan leh thutpui nan hman a ni bawk.
Tin, an Kohhrana Thuhril pawimawh bikte chu hrtah hian an thleng bawk thin. Eirawngbawlna, inthiarna leh mutna khum nuam tak te a awm bawk a ni.
He CALVARY Biak In hi a dung ft63 a vang ft30 a din a ni a, a hnuai ber chu Kristmas, Kumthar leh ruai kilho hun apianga ruai siam nan leh ruai kilho nan hman thin a ni. Hetah hian inthiarna hmun 3 lai, thianghlim taka siam ani bawk.
Tin, CALVARY Biak In hi Lai Tawng veka Pathian Biak leh fakna a ni bawk. Lai hnam nihna diktaka Pathian Biakna hmun a ni. Chandmary Pastor Bial Local Church 4 zinga Local pakhat niin Rev. H Lalhmangaiha`n a bial lai a ni. An Tualchhung Kohhran hruaitute chu:
Upa T.Thangchuak – Local Pastor
Upa Z. Nitling – Chairman
Upa Altiam Zathang – Chairman Elect
Upa Patrict Savang – Secretary
Rbt Ngunkhar – Asst. Secretary
Rbt MC. Thanghninthang- Fin. Secretary
Upa Suithang – Treasurer
CALVARY Kohhran te hi Saiha leh Lungleia an awm lain MIzo hla an thiam loh avangin Lai twang Pathian an lo biaka, a hrana an inkhawmchu anlo hriatthiam hlawm loh avangin Lai District khawpui Lawngtlai hi rawn panin Lawngtlaia lo awm hmasa ten en in rawn khawmin alvary Kohhran hi dinin a hmasa berah Pu Hrangkhuma inah an inkhawm a, a vawi hnihna chu Pu Thangzuala inhnuaiah hawhin an inkhawm a.
Tin, a vawi thumna chu tuna DakIn hmun hi ala ruah lain hawhin Maurap In an sa a. Chu Maurap In chu Thliin a tihchhiat avangin Pu Thangzuala In hmun chu Rs 40,000/- (singli) in an lei a, Tuna an Biak In hi an lo din ta a ni. Miin luah leh inhlawhfa chawpa eizawng an ni nain, Lairam Isua Krista Baptist Kohhran ah hian thawhhlawk tak Tualchhung Kohhran pawimawh tak an ni.
An Kohhran lo pawmtu leh Fellowship a lo hawnsak tu chu Lairam Isua Krista Baptist Kohhran niin Dt:25.10.1992 ah Rev Th. Vanlalzauva leh Upa Hniartura te an ni.
Tunah chuan Local Church puitling tak a lo ni veta a, In 60 vel an ni a member 230 vel an lo awm ta a ni,
CALVARY AH AN TAN A TUAR TAWH VANGIN

MIZOTE LEH KRISMAS By Rbt. Lalmaka Tluangneh

Krismas hi kum tin khel lovin kan hmang thin a; amaherawhchu eng tihna nge a nih a, eng tiklaia hman tan nge tih leh khawi ramah nge an lo hman tan a, engtin nge kohhran hmasa ten an lo hman tih hi tam tak chuan kan hre lo chang ni lovin, ngaihtuah pawh kan ngaihtuah ngai lo mai thei.

Krismas tih chu Krista pian lawmna emaw Krista pian hriatrengna tihna a ni a. A hun leh ni tak erawh hriat a harsa khawp mai. Clement of Alexandria (AD 200) chuan, Lal Isua pian ni chu May 20 a ni e, a ti a. De Pascha Computes (AD 243) chuan March 28 a ni, a ti ve thung. Hippolitus (C 170-C 236) erawh chuan Dec 25 a ni, a ti a. Hriat dan leh ngaihdan tam tak zingah Dec 25 chu dik deuh berin a lang. ( A dik chiah a ni kan ti dawt ngamlo na a; AD 354 khan Pope Liberius-a hoin Rome-ah an lo hmang tan a ni tih erawh hriat a ni.]

December 25, krismas ni atan a hman a ni hi thenkhat chuan an duh lo hle a, a chhan chu Mithra betute kut ropui tak ‘Sol invictus’ Ni (Pathian) kut ni a ni a, Ni (Sun) betute kut ni kher kher Krismas ni atan a hman chu a ni thei love an tih vang a ni.

Amaherawhchu, kan ngaihtuah tel tur chu hei hi a ni.Ni (Pathian) kut ni a nih vang ringawtin ni chu kan bia tihna a ni lova. Jehova chu engkimtithei a nih ang ngeiin Ni (Sun God) chungah a leng a; hneh theih loh (invictus)te hneh theih loh a nih avangin a chungnunzia lantir a, hemi ni ngeia a piancham kan lawm hi a dik a ni. A thuhrimin ni(date) hian kawngro a su ber lem lova, chuvang chuan kan buai tur ni pawhin a lang lo. Hnehna ni, hnehna kut a ni tih kan hriat tlan a tha awm e.

Sawi tawh ang khan Krismas kan hman tan kum chiah hi hriat a har hle a. Rome Bishop pahnihna, Telesphorus chuan Bishop a nih laiin AD 137 khan Krismas hman dan tur a siam/duang chhuak a. (Chumi avang leh puhmawhna dangte avangin an hek a, martar-in a thi ta a ni. ) Tin, AD 300 khan Krismas dar hmasa ber chu Bishop Paulinus chuan Italy ram Nola, Campino khuaah a vua a, hengte hi Krismas chanchina hmasate chu an ni mai awm e. Hei hi calendar hlui tak, Rom lam chhuak Philocalian Calendar 336 AD chuan a nemnghet a ni.

A hman tan kum chu a enga pawh lo ni se, Krismas hi khawvel hian a buaipui a, a ur nasa a, a uarin a urhsun em em a ni. Sakhaw hrang hrang zuitute hian kut chi hrang hrang kan nei theuh hlawm a. Mahse, krismas aia huhang ngah leh lawm hlawh hi a awm lo. Hei hian kan Pathian ropui- zia leh chungnunzia a tarlang chiang hle in a lang.

ZORAMAH: Kan pi pute hrenpereng kaih a, siapsuap leh hnawkhal nen, thingbul, lungbul an la belh lai khan mite chuan:
‘A thilpek sawi hleitheih loh vang hian,
Lalpa chu engnge ka pek ve ang?’ tiin lu chum, ban chhum huamin ramthim ramro an lo su bur bur tawh a. Chumi zungzam rawn kal zel chuan March ni 20, 1891 khan he Zoram khawvel hi a rawn kap eng ve raih a. Chuta tanga kum sawmpahnihna, 1903-ah chuan zoram khawvel chanchina thil mak leh chhinchhiah tlak em em ‘Krismas hmasa ber’ chu Aizawlah a lo thleng ta a ni.

Hemi kuma Krismas an hmannaah hian Tirhkoh hmasa berte zing a mi Vanchhunga (a hnua Pastor ni ta) leh Lianphungate chu an unaute (kristian-puite) Sethluna awmho Aizawla (mas) hmang tura sawm turin buhseng laiin an kal a. Anni hian an va hmanpui leh hmanpui loh erawh chu hriat a ni lo.

Hemi tum hian puitling lam an tel tam lova, sikul naupang deuh vek an ni. Pu Zosaphluia (Rev. DE Jones) leh Pu Zosapthara (Rev. Edwin Rowlands) ten an hmanpui a, thu an sawi bawk. Bawng an talh a, mahse ruai an la theh lo. Tin, Biakin an la neih rih loh avangin Hmeichhe sikulah an inkhawm mai a, an la zaikhawm rih lo bawk. Zaipawl pathum: tlangval zaipawl (Dala ho), tleirawl zaipawl (Chhinga ho) leh naupang zaipawl (Thanga ho) an awm a, ‘Mizo kan nih lawm ilangin’ tih hla sain an inel a, Pu Dala hoin lawmman an dawng.

Kum 1905 chuan Zosapthara rawtin thangthleng an kam a, an sava awhte thawhkhawmin vawk sum nga sa nen ruai an theh. Kum 1912 atang chuan zan lamah intihhlimna siamin lemchan chi hrang hrang an chhuah a, ruai siamin naupang hnenah chithlum mumte an sem bawk. Hemi kum vek hian Lunglei lamah pawh an hmang tan ve a ni. Kum 1914 vel atang chuan thingtlang lamah pawh an hmang chho ve zel a. Chuti ang chuan lo darh zau zelin tunah phei chuan kan hnam nunah nghet takin a bei ta. Kum 1919 a harhna a lo thlen tak atang khan intihhlimna chi hrang hrang leh lemchante chu bansan a lo ni ta a ni.

HLA LAM: ‘Khawmhma pal a er an ti, a er lehlo an ti’ tia kan pi pute er ngawng ngawng a, an suk tawrh tawrh lai khan leh hla, phuah zawh khalh an hlauh avanga ‘Our greatest poetess’ Pi Hmuaki, a nung chung meuha an phum hun laite khan kohhran hmasate chuan rimawi chikim remin Lal thar lo pianga chu lawmin zai hla an lo rem tawh a. A ni, Juda hruaibo-a awmte’n, ‘Aw, Jerusalem, ka theihnghilh che chuan………’ an tih dungthula Jerusalem khawpui, muslim ho kut atanga chhuah zalen tuma ralthuam famkim nen ke an pen lai te; ‘Chungnung berah ropui rawh se’ tia Isua pianna hmun ngeia zai hla an rem tlut tlut laite khan keini ho chu, amah Zikpuii Pa tihdan takin, ‘Khi-ah, khi-ah, kawlvalenchham, thim lal thuneihna hnuaiah’ kan la tal pawl mai mai rih a. Zing eng mawi tak chuan hnuhma a neih deuh deuh a, hma a sawn deuh deuh hnu chuan, ngaiteh! kan rin phak ngai loh leh mang lam pawha kan la man chhin ngai loh thil mak a lo thleng ta! Hebrai leh Grik finna chawhpawlh zira, chunglam thiltih theihnain a tirhna apianga kal tura a hrual zawite Pu Buanga leh Sap Upa chuan kum 1899 khan a awm ngai tih pawh kan hriat loh ‘Krismas hla’ min pe ta! Khai aw, en mah teh:
‘Sebawng ina a piang ta,
Ran chaw thlenga an muttir a,
Beram vengtuten an bia a,
Mifingten an lo be bok a.’
(Hla Bu (1899) chang 2-na)

Thil mak deuh mai leh chhinchhiah tlak tak chu Krismas, a rim a ra pawh kan la hriat hma hauh a a ‘hla’ kan lo nei hmasa tlat hi a ni. Hemi kum hi hawrawp kan neih (1894) atanga kum 5-na, Krismas hmasa ber hman hma kum 4-na a ni bawk. A thu hi a ze nek nawk viau na a, hmasa ber dinhmun a hauh avang hian a pawimawh em em a ni. (Min siamsak tute thlarau chu siamtu ang chhungah chawl mawlh rawh se.)

Kan sawi tak ang a thimna leh mawlna rama kan la chen lai a, rimawi chikim hmanga lal piang lo lawm tute ai khan kan krismas hlate hi a class a sang zawk emaw ni chu aw, a tih theih hial mai. Hemi chungchanga Prof. Siamkima Khawlhring(fam ta) tawngkam i lo ngaithla teh ang. “Kan Mizo krismas hla phuah tute hian an phuah chhan leh changthlan te hi an hmu chiang hle hlawm bawk a. Hnamdang krismas hla kan hriat phak leh lar deuh deuh te nen pawha khaikhin hian kan krismas hlate hi a duai bik lo hle a ni. Silent Night tih phuahtu hian Bethlehem dai vel hi ral khat hnai deuh atanga thlirin a phuah niin a lang a; O come, all ye faithful (Ringtu zawng zawng te u) tih phuahtu hi chuan Bethlehem lam pan tur leh lal fapa piang chu fak bawk turin min kohkhawm a tum a. Zopa ngaihtuahna erawh chuan, Sappui mingo ngaihtuahna a leh khalh emaw tih mai tur a ni, Bethlehem thlen chu sawi loh, a dai bul velte pawh fang velin
‘Aw, angelte chu lo zai nawn leh se,
Bethlehem hmun dai khawhara ka awm lai hian’, tiin alo awm hman reng a ni’(Zalenna Ram Page-132)

Tin ngaiteh, heti hi a ni a. Sappui miril hote Bethlehem lam hawi tura an insawm mek laiin mipakhat, a hming Selbawnga thalbe atanga lo chhuak Zaliana, fahrah leh pisil avanga Patea an tih chu retheih leh fahrah vanga kum 35 lai mai Khawbung lal, Lalbika vanlung ura awm mah nise, Lal lo pian chhan a hriat chian em avang chuan:
‘Hmana pi leh pu ten an hmuh phak loh,
Saron par tlanin kan leng e’, tiin engthawl em emin
Saron par tlanin a lo leng der der a. Lal Isua pian zan chuan Bethlehem dai bul vel chu hrutin a lo fang vel a. Angelte leh Berampute chu biain a lo ti-ti pui mawlh mawlh a:
“Han thlir teh u, Angelte u,
In lawmlai Lal Isua.’
“Cham rih ula, Berampute,
Hmun khawhar kalsan s’u.”
Chu chu a la duh tawk mai lova,ran in kawt (kawngthar)- ah chuan dingin nausen en tura lo kalte chu lo chiau-auin a lo bia a. Nausen chu a lo kawhhmuh hlawm a:
‘Bawng In tlawma ka Lal riangvai tak saw,
A chun riang Marin a chawi e’.

Tin, chumi ram vekah chuan Zasiama an tih chu a awm bawk a. A ni hi chu Patea angin a tuan rang tawk lo emaw a nau deuh a ni mai thei. Isua pian zan chuan Bethlehem dai hmun khawharah chuan a lo awm ve hman lova; angel-ho zai chu ngaihthlak ve chak em em mahse a ngaithla ve hman lo. Zan dangah chuan, ‘bei nge sei run dung’ tiin a lo chang ve khar mai a. Angel-ho chu zai leh ngei se tiin duhthu a lo sam a:
“Aw, Angelte chu lo zai nawn leh se,
Bethlehem dai hmun khawhara ka awm lai hian.’
Kan sawi tawh ang khan hnam dang krismas hla phuahtute chuan Isua pian dan leh Krismas hman nachhante chu sawi ve bawk mahse, Bethlehem thlen chu sawi loh, pan turin an insawm laih laih chauh a ni a. Thenkhat chuan ralkhat atangin Bethlehem chu an thlir ve a, thenkhatte ngaihtuahna erawh chuan America khawmualpui pawh a pel meuh lo.

Chutih laiin kan Mizo Krismas hla phuahtute ngaihtuahna chuan kil tin kil tang hrutin,hmun tin ram tin a fang a. A changin Bethlehem tual laiahte lengin khualbuk neitu an hau va; Berampute kal liam mai tur chu la cham rih turin an chelh bawk a. A chang leh ‘ usher’ ah te an tang thul. An fakna hla sak te chu khawvelah hian khat vek se an ti a; mi zawng zawng an fak hla sakpui turin an sawm a; tlang leh tuifinriat chenin an phut a ni. An hmuh ang leh hriat ang chu la hre velo leh hmu ve lote hriattira hmuhtir an chak em em a, an sawm a, an kar hial a:
“Aw tunah hian i kal ang u;
Hmun khawhar lam chu i pan zel ang ‘.
Chu chang ni lovin Krismas hman dan[tur] tha ber kawhhmuhin min hrilh a:
“Ka thinlung ram Kaisar Lalnaah hian
Bethlehem tlangpui rawn din la,
I tan ranthleng rawn hung leh la,
Tah chuan lo cheng ang che”.
Kan sawi hmaih phal hauh loh tur chu, kum 1885-a Sawleng a piang, kum 6 mi lek a nih laia Tuirini lui lung nala a tawlhthluk avanga thimin a damchhung zawnga a tuam tak hlen tak; mahse khua hmulo chung pawha mahni ar thliarhrang ngat thei; sa awh har tak Sanghar pawh 50 lai awk thei ngat, Mizorama Salvation Army Corps Sergeant Major hmasa 3 te zinga pakhat, kan hlaphuahtute zinga hnam dang laka uire lo ber tih hial tlak Laithangpuia, kum 1937 a ‘Vanruai ropui kil’ tura ‘Thihna Jordan kai’ ta kha a ni. Ral do reng rengin a buaia, naupiang pawh a lawm ve hman meuh lo niin a lang. Mahse, mi lungleng thei mi a nih avangin hunpui inher vel hian a nunah nghawng a nei nasa hle a. Kum bul atanga a hun lo hman tawhte chu a chhuikir neuh neuh a,kum a’n hlui mai tur chu ngai em emin a thlir vawng vawng a. A insum zo ngang lova; hun chu mihringah chan(personify) a be mawlh mawlhin:
“Kumsul lo vei kan nun mawi leh hun tha,
Hmanlai in chang ta dawn maw ?
Tinkim kan dawn khawlin,
Awmkhua in tihar ngei”.
Chutah mai chuan a la inhrithla zo lova, a ui ngawih ngawih a, bana chelh hial a duh a; mahse chelh din chi a ni silo, vial ngawl ngawlin ti hian a’n chhamchhuak leh a:
“Theih zawng ni se hun lawmawm ka vuan tur,
An inherliam ta siau va,
Nunhlui ngaiin kan her,
Hmanlai kan ti vawng vawng”.
A ni, mihringte hi nunhlui ngai hian kan her a, kan vial ngawl ngawl a, hmanlai kan ti vawng vawng thin theuh a nih hi maw!

Mahse, Laithangpuia nihna (zia) chu chutah chuan a tawp lova, a famkim hek lo. Beidawnga indawm kun reng chi a ni lova; mi huaisen, raldo mi a ni kan tih kha. Kum lo thar tur, khawfing chat laia ni zung lo lang raih chu a hmuhin chibai bukin a lo ‘Welcome’ a:
‘Kan nghah kumthar lawmawm chu a lo thleng,
I zai ang hlim takin aw’ a ti te te a,
‘Kan fakin kan lawm che,
Nang hun leh kumthar lawmawm’, a ti zui a;
‘Hnam tin tan hun mawi tak,
Lenkawl ni a lo chhuak’ ti meuhin a lo lawm a ni.
Kumthar hman dan tur min kawhhmuh dante hi han en teh:
‘I zai ang hlim takin aw,
Nunhlui ngaih a sawt lo,
Kan hmalam i thlir ang’.
Ni e, nunhlui ngaih hi a sawt lova, kan hmalam, kan hmabak hi kan thlir a ngai a ni.

Heti taka kan krismas hlate a san nachhan nia lang chu, ‘A chhandamna hla, sap-hote phuah tirtu Pathian bawk kha a ni, Mizote phuah tirtu pawh hi’. (RL Kamlala, Editor hnena lehkhathawn : Tun lai, March 1962) tih hi niin a lang.

Hla tha reng reng chu a phuahtu ta bik ni lovin, mi zawng zawng ta, kan intawm tlan vek a ni a. Hla tha chuan a zirtu emaw a satute film kan ena thil chiang taka kan hmu ang hian kan hmaah chiang takin hlimthla a rawn hung a, min entir a, suangtuahna ramah min chentirin chenna ngai loh ram min fantir thin. Chu chuan a changin hlim em emin min lamtir a; a changin lungchhe vankaiin min tahtir a, a chang leh min nuihtir thin bawk. Hla phuahtute hi an va ropuiin an va hlu tehreng em!

Kan hlaphuahtu: Patea, RL. Kamlala, Suakliana, Zasiama leh Rokunga (1920-1950 inkar chauh kan chhui a) te thlen chin hi a sangin a thuk em em a; an tello chuan zaikhawm a nuam lova, urlawk atanga atiak thleng mai hian kan che thei lova, kan tlei thei thlawt lo a ni. He khawvelah chauh pawh ni lo, van kawtthler mawiah ngei pawh khian kan hlate hian hnam dang hla chu khumin ka ring thin a; Van Lalber ngeng pawh khi a chhun zawk ngeiin ka ring thin.

He khawvel hi inher zelin hunte chu lo danglamin lo inthlak thin mahse, Mizo kristiante awm chhung chuan heng kan hlate hian chuai ni a nei lo ang a, daih ni a nei hek lovang. An hlu tulh tulh anga, an la hlu zual zel dawn a ni, ‘a in mite chuan uaiin chu a rei apiang an duh si a’.

POLITICAL EDUCATION – Rev. C. Hrangzuala

Chanchintha hrilh leh ram rorelna leh khawtlang nun siamthat hi ringtute mawhphurhna kan kova innghat tlat a ni. (Evangelical and socio-political involvement are part of our Christian duty)
Chanchintha hril bak buaipui ngai lo leh missionary tirh chhuah chauh hi ringtu te tih tura nghet taka pawm thin Evangelical Kohhranhote pawh an ngaihdan a lo dang ta hlek hlek a. 1974 kuma Congress on World Evangelization, Dr. Billy Graham hova Lussanne a khawmpui an neih khan ram rorelna leh khawtlang siamthat ringtute tih tur leh mawhphurhna ah an pawm nghet ta hle. Chutiang ngaihdan te evangelical kohhran hruaitute meuh atanga a lo piang ta hian ram rorelnaa Pathian ram lo thlen tur thu leh engkim mai hi Pathian ta, ram rorelna leh lalna leh thuneihna tenen lam Pathian thu a nih zia a tarlang zel a ni ber awm e. (Kol.1:16).

Political Education thil tum – Ram hmasawnnna tura Sorkar tha buatsaih

Ram hmasawnna rahbi pawimawhte:
1. Ram rorelna dik leh sorkar tha kalphung nghet tak din.
2. Ram leh hnam humhalh a, hnam ziarang vawn nun leh tih hmasawn.
3. Ei leh bar leh nitin khawsakna mamawhna intodelh.
4. Ram leilung leh a chhunga awmte lui, nungchate, thing leh mau humhalh a hman tangkai
5. Zirna (Human Resource Development) kalphung tha buatsaih

1. Ram rorelna dik leh sorkar tha kalphung nghet tak din.
Sorkar tha nei turin roreltute leh mipuite hi an pawimawh ve ve a chu chu Pathian thu ah pawh kan hmu tawn ve ve a ni. Ram rorelna leh roreltute chungchanga Pathian thu kan hmuhte.
1.1:Ram hruaitu chu Sakawr a ngah tur a nilova, ngah turin mite a thurualpui tur a ni lo (Deut. 17:16-17):
‘Sakawr ngah’ tih hian tunlai hunah chuan sum leh pai hauhsakna lungkham leh lalna leh thuneihna an chan hnu a inlak hauhsak nan a hmang thintu te a kawk berin a lang. Rorel tuten sum leh pai an lungkhama hausak tum na a awm chuan Sorkar tha beisei theih a ni lo. Sorkar tha chuan mipui intluktlang taka an awm theihna tura hamthatna sem rual thin a ni. (Equal distribution of wealth and opportunities). Sorkar tha lo ramah chuan chanvo chi hrang hrang sem rual a awm ngai lo,roreltute leh thuneituten an tana mitangkai tur chin zawng an thurualpuiin an induhsak tawn thin a, mi retheite an bet tial tial thin. Hei hi Pathian huat zawng tak a ni tih zawlnei Amosa a lekhabuah pawh chiang takin kan hmu.
1:2. Roreltu chuan nupui a ngah tur a ni lo (Deut 17:17):
Israel Lal duhawm tak Lal Davida’n chungkaw keh vek khawpa buaina a tawh a a lal thutthleng pawh luah ngam lo thin na chhan pakhat pawh hmeichhia vang a ni. Israel lal fing leh chhuanawm tak Solomona pawh Pathian in a lalram a chhuh sak a a chiahlawh kuta a pek nachhan pawh hmeichhia vang bawk a ni (I Lalte 11:10-11). Roreltute tan chuan nupui ngah hi an hmelma lian ber a lo ni tawh thin a, Pathian ngaihin lal thutthleng leh hmeichhe buaipui kawp hi thil tenawm tak a ni.
1:3. Ram dang mi, hnam dang mi a ni tur a ni lo (Deut 17:15):
Indian National Congress (INC) Party chhungkua an fimkhura an buaipui fo thin pakhat chu ram hruaitu atan ramdang mi (hnam dang mi) an duh lo thin hi a ni. Aigupta sorkar pawh kha ramdang miin Pharoa dinhmun an luah chang a awm thin a, mipui an lungawi thei lova remna leh muanna a awm thei lo fo thin. Pathianin hnamtin te kan chenna ram tur min ruat sak theuh a, ramri te pawh min kham sak theuh a, roreltu tur pawh a ram leilung fa ngei ruat hi Pathian thu a ni.
1.4. Engvangin nge roreltu thalo an awm thin?
Roreltu tha lo tak tak mipui tana rit lutuk leh rawng tak taka rorel thin an lo awm tawh thin a ni tih leh chutiang roreltute chu Pathian ruat an ni tho a ni tih Pathian thu ah kan hmu bawk.
“ Kan sual avanga kan chunga Lal atana i ruatte lah chuan an neih nun phah a…” (Nehemia 9:17, Marka 10:42) Mipui an fel lova thu awih lo leh dik lo taka an nun hian Pathianin roreltu tha lo a ruat sak thin ni ngei tur a ni. Pathian thu vekin hetiang hian a sawi, “Chununga bera chuan mihringte lalna ram chungah thu a nei a, a duhsak apiang te hnenah a pe thin” (Daniela 4:32). Tin, I Pet 2:14 ah chuan thil tisualtu te chunga phuba la tur leh thil tha titu te malsawm tura amaha tirh ram awptu an awm thu kan hmu.
Mipui rinawm lo tan roreltu rinawm neih a har hle a. Roreltu tha an awm lohin Sorkar tha a awm thei bawk silova chuvangin Sorkar tha nei tur hian mipui leh roreltute an pawimawh dan a in ang reng awm e.
1.5. Ram chu Lalpa ta a ni (Sam 22:18):

Ram chu Lalpa ta a nih tih leh rorelna chu Pathian ta a ni tih Deut 1:17 kan hmuh mai bakah II Chro 19:5-7 ah chuan ‘Mihring tana rorel in ni lova, Lalpa tan a ni zawk si a. Rorelna ah chuan in hnenah ka tel zel a ni. Pathian thu in a ti a, chuvangin ram rorelna tha tak nei tura tih tak zeta tan lak hi Pathian thu a nih avangin Kohhrante mawhphurhna a ni.
“Rorelna fel zawng ula hnehchhiahna tuarte tanpui ula” Isaia 1:6.
“Rorelna ah thleibik in nei tur a nilo, tumah in hlau bawk tur a ni lo” Deut 1 :17.
“Inthawina aiin dik tak leh fel taka awm chu Pathian tan a pawmawm zawk” Thuf 21:3.

2. Ram leh hnam humhalh a, hnam ziarang vawn nun leh tih hmasawn.
Sorkar tha chuan ram leh hnam a humhalhin hnam ziarang a vawng nung a, a tihmasawn thin bawk. India sorkar laipui sum senna nasa tak pakhat chu a ram mipuite humhalh a ni. Sorkar hian ram a neih zau hle laiin inches hnih khat lek hleh thlak pawh hi a phal lo tlat. Hei hi sorkar ropuina leh zahawmna tak pakhat chu a ni. Leilung humhalh mai nilovin a mi leh sate a humhalh hle bawk. Hnam upa leh ram changkang apiangin ram leh hnam humhalh an ngai pawimawh.Ram leh hnam humhalh kan tih hian kan hnam nihphung leh zia rang humhalh a tih hmasawn hi a kawk tel bawk a ni, hemi chungchang ah hian kan LADC sorkar pawh hi a thang harh sawt hle. Ram leh hnam humhalhna atana rahbi pawimawh tak tak LADC Sorkarin a kalpui mekte :
2.1: Lai tawng school a zirtir
2.3: Lai dress a vawng nungin a ti hmasawn thar zel
3.3: Hnam lam (Cultural dance) a vawng nungin a ti hmasawn
3.4: Inhmun huan ram pek a fimkhur
3.5: Laifa ni lo tan ram hruaitu nih a rem ti lo
Ram leh hnam humhalhna atana a chunga LADC hmalakna hi a ropuiin a ngaihsan awm tak zet a ni.
Hmalak thar zel tulte:
i. LADC office a Lai tawng official language a hman.
ii. Lai History leh Culture hmasawnna atan lekhabu a tam thei ang bera buatsaih.
iii. Lai tawng leh Lai culture hmasawnna tura Seminar leh Workshop neih thin.
Pathianin hnam min din sak a tawng leh culture min pe a chumi vawn nun leh tih hmasawn chu kan ram mipui mawhphurhna a ni

3. Ei leh bar leh nitin khawsakna mamawhna intodelh:
“Sangha min barhtu ai chuan a man dan min zirtirtu kan mamawh zawk” — A New Idea. K. Sapdanga.

Ram hmasawn (developed countries) leh ram changkang kan tihte reng reng hi nitin khawsak leh ei leh in intodelh te an ni deuh ber. India ram chhung leh ram pawn a state intodelh hote chanchin ah hian zirtur a tam hle. Punjab state khu 1950 vel kha chuan ram ro leh ram rethei tak a ni e, an ti thin a. Mahse Badal Prakash Singh a Chief Minister tak hnu khan ram leilung nasa takin an zir a, buh leh wheat a hlawk takin a thar theih tih an hmuhchhuah a ni a,tichuan Sorkarin buh leh wheat thar turin nasa takin tan a la a, an mahni state bakah state tam tak chawmtu leh ram intodelh, sum lakluhna nei tha state an lo ni ta hial a ni. Arunachal state khu North-East a state hnufual leh intodelh tura beisei ngai loh an nih laiin ram hruaitu fel tak, Gagong Apang an neih hnu khan kawlpheta (power) buatsaihna ah an hlawhtling thei tih an hria a tunah chuan power atanga an sum lakluh in state intodelh an ni ve leh tan dawn ta. North-East state dangte tan um phak an har tawh ngawt ang. Ram hrang hrangah hian Pathianin leilung hauhsakna a phum ru vek a chutiang hai chhuak thiam ram hruaitu an awm hian ei barah an intodelh mai thin a ni. entirnan: kan ram, LADC area bik ah hian Butter thei (Avacoda) te leh Red Oil Palm te hian a leilung a ngeih tak zet a nih chuan kan sorkar hian ngun takin mipuite zirtirin convince hmasa sela chutiang thei lehthlai ching ringawt pawhin intodelh thuai dan kawng a awm ngeiin a rinawm. LADC area a mihring awm zat
Khua (Village) 87
Sub-village 11
Chhungkua 16000
Mipa 41658
Hmeichhia 41471
Total 83121 (Source:LADC’s LAD Dept.)

A chunga chhungkua 16000 ah hian 6000 te hi chu sorkar hna leh ei zawnna kawng nghel nghet tak nei tawh an nia a, chhungkua 10000 eizawnna nghel nghet tak ngaihtuak sak hi sorkar tha tan chuan hmalak dan tur ni awm tak a ni.

Ram intodelh nan Chhiah (Tax) hman tangkai a tul:

Ram hmasawn leh ram changkang (developed countries) ten a hmasawnna rahbi a an hman ber chu chhiah (tax) a ni. Chhiah dik tak a pek hi mipui mawhphurhna a ni a dik lehtangkai taka lo hman hi ram hruaitute (Sorkar) mawhphurhna a ni thung. Thunei tuten chhiah an hman dan ah mipui an lung awi loh chuan chhiah an pe tha duh lo a ram hmasawnna a awm thei lo. LADC area mipuite hian chhiah pek lamah kan rinawm tawk lo a, mipui aiin hotute leh roreltu ten an ti tha lo leh zual a. Tin chhiah lak zat leh a hman na hi mipui beng hriat ah sorkarin a tarlang hlei thei tlat lova chuvangin chhiah a pung chak lo a ram hmasawnna thanmawh bawk a ang hle. Kum 4 kal ta a LADC a chhiah luh dan:
Kum Amount
2009-2010 Rs. 72,89,989.00
2010-2011 Rs. 81,42,120.00
2011-2012 Rs. 1,13,08,183.00
2012-2013 Rs. 1,25,79,228.00
(Heng chhiah lakah hian Kaladan Multi-Modal Transit Transport Project in a paltlang pass LSC tam tak te chhiah hi pek ni lova hriat a ni) Source: LADC’s Fin. Dept.

LADC sorkar hian thahnemngai leh zualin chhiah la se kumtin nuai 150 te chu la thei ngeiin a rinawma. Amaherawhchu, chhiah hi engzat pawh la ila ram hmasawnna leh intodelh nan Agriculture project emaw intodelh na lam hawi a hman a nih loh chuan ram hmasawnan awmzia a nei tlem hle dawn a ni. Sorkar tha chuan ram hmasawnna ngaituaha chhiah hman tangkai hi a tihtur a ni. Tin, Agriculture lama intodelh bakah thil dang mamawh insak, rod, cement concrete works (RCC) lama hmalak te pawh a tha hle. Lawngtlai DC hnuaih hian in satu (Mistiri) 140 vel kan kawl deuh reng a hriat a ni a (Source DC’s Office, Lawngtlai) heng hnam dang mi nikhat hlawh hi Rs.56000.00 vel a chhut a ni a, an kum khat hlawh hi ( kum khat ni 180 thawk a chhut in) Rs. 1,00,80,000.00 vel a ni. chutiang a nih chuan kan ram a pawisa hi ram dang mi hnenah kum tin nuai za labour charge ah kan pe chhuak a ni. Kan khua leh tui eizawnna nghel nghet nei lo mamawh tak tak kan awm si a, chung te tan chuan RCC work training centre leh an zir chhunga stipend ngaituah sak ni se la, hnam dang hnena pawisa tam tak kan pek chhuah hi keimahni kutah ngei a cham bang dawn a ni.
“Intodelh tur chuan dehchhuah tih pun aiin hmanralna tih tlemin hlawhtlin a awl zawk”—A New Idea. K. Sapdanga.
‘Ram hmasawn te tarlanna pakhat chu ram chhungah inhlawhfa duh mithiam technical leh computer expert mite an lut hum hum thin, kan ramah ve thung chuan an rama khawsak ngaihna awmlo kan khawchhak unaute leh Karimganj a in chawm zo lo vai labour (vai mistiri leh thirchhe zawng) pur rawnchaw bak hmuh tur an awm lo tlat hian kan ram dinhmun hnufual zia a tarlang chiang hle.

4. Ram leilung leh a chhunga awmte lui, nungchate, thing leh mau humhalh a hman tangkai:
Karnataka leh Tamil Nadu state te inkara buaina leh harsatna tawp hlei thei lo chu Lui tui hausakna (water resource) hman tangkai chungchang a ni. Cauvery lui tui an inchuh chhunzawm ngat ngat zel chu a la ni a, an harsatna hi sut kian mai a harsa in a rinawm, a chhan chu luitui an hmang tangkaiin an tan a hlu em a ni. Sorkar tha chuan ram hausakna water resource a hmang tangkai hle thin a chu chu a ram intodelhna rahbi pawimawh tak a ni fo. Kan ram hian ram dang intodelh te ang bawkin water resource a nei tha hle. Chhimtuipui tluka water resource tha hi state dangah leh ram dangah awm ta se thlai chawm nan te, power siam nan te bakah tui hnianghnar tak a mipuiin an hman theih turin buatsaih a ni tawh ngeiin a rinawm. Sorkar tha kan tih hi ram hausakna, hmasawnna leh intodelh nan a hmangthiam te hi an ni. State emaw local government chakna hian ram hausakna hman tangkai na ah hian phak tawk an nei thin a, chuvangin sorkar tha ke pen dan reng reng hi ngun leh zualin kan zir chuan ram dang te thiamna leh thil tih theihna an ram ,chhunga hman tangkai dan an ngaihtuah thin a ni. Chutiang ang ruahmanna leh remruat thiamna chu ram hruaitute thinlunga a awm loh chuan ram hmasawnna in ke a pen chak hlei thei lo fo thin. Bihar state pawh hi ram rethei tak an nih thin avangin an tlangval te pawh inhlawh fa tura ramdanga vahchhuah a ni fo thin. Tuna an Chief Minister Nitish Kumar an ram a hruai chin ah hian state hmasawn zawk te leh ram dang (Foreign Company) te nen an thawhhona a tha a, tunah chuan Bihar tlangval te pawh anmahni ram chhungah thlamuang takin hnathawh sen loh an nei tan ta. Kum tam tak kalta ngaihtuahin Bihar state ralmuan lai leh hmasawnna rahbi duhawm tak an rah tan hun a lo thleng ta a ni. Sorkar tha kan tih tak zet hi chu ram hruaitu ah a in nghat thuk em em a ni. Tin, state thenkhat chuan an ram chhunga thing leh mau an humhalh leh an hman tangkai mai bakah thing hlu leh man tam hmangin ramngaw thar an siam chawk thin. Malaysia rama Sandal wood hmun te han fan meuh chuan sorkar in tul a tih hun apiangah maktaduai tam tak lei theihna thing man hlu tak sandalwood an ngah tawk a ni. Sorkar tha enkawlna hnuaiah chuan ram leilung a kum telin a hlu tial tial thin.

LADC sorkarin kumtin PHE Dept. sumin Sintex a lei vak vak hi a tangkai reng mai. Amaherawhchu heng sum tam tak hian tuikhuapin pump ni ta se, kum 10 chhung chuan project lian leh hlawhtling a nei hmanin a rinawm.Sorkar tha chuan ruahmanna tha (plan) a nei thin, ruahmanna tha a awm loh chuan hlawhtlin leh hmasawnna beisei tur a awm chuang lo.

5. Zirna (Human Resource Development) kalphung tha buatsaih:
Pathian lehkha thu a kan hmuh angin Pathian hian finna te, remhriatna te, thiltih theihna te mihring te ah a dah a (Thuhriltu 3:11), chu chu zirna leh thiamna atanga hai chhuah chi a ni, chu chu hnam fing hmasa apiangin an hrethiam a zirna kan tih human resource development hi ram hmasawnna kaida a ni tih hria in zirna buatsaih nan sum sen an hreh lova beihpui an thlak thin. Kumpinu (England) sorkar in ‘Ni tla seng lo ram’ a awp theihna chu zirna leh thiamna human resource development – a an advance vang ani. Sap thufing ah chuan “knowledge is power” hriatna hi thil tihtheihna a ni a ti tlat reng ani. Khawvel a finna in phum ru zawng zawng hi thiamna leh hriatna atang chauh a neih theih ani si a ,chuvangin ram hmasawnna hi kan duh takzet a nih chuan human resource development hmalakna ah beihpui thlak a tul ang.

Zirna tha buatsaih tur hian sum tam tak senga hmalak a tul laiin zirna kalphung tur tha hmuhchhuah hmasak hi a pawimawh zawk a ni fo thin. LADC sorkar hnuai ah hian Primary School zirtirtu non-plan 310, plan 162 leh Middle School zirtirtu non-plan 319, plan 48 a vaiin 839.(Source: LADC Edn. dept) thawk lai kan nei mek a, chutih laiin kan ram atanga zirlai chhuanawm deuh pawl 10 ah te pawl 12 ah te result tha nei deuh hi sorkar school atanga chhuak sawitur an vang hle. Chik leh zual a kan zir chuan vantlang chunglam sorkar school a an fate dahduh an awm meuh lo bawk. Tuna sorkar school kan neih mek ai a tam leh zirtirtu thawk lai ai a tam zawk mah hi school leh zirtirtu nei thei ila zirna tha kan nei ang tih sawi ngam a har le ani. Hei hian zirna tha buatsaih turin ruahmanna tha a mamawh a ni tih a tarlang chiang a ni.

Tin, kan ramin mithiam kan tehna ber leh mithiam kan mamawhte chu english, science leh mathematics thiam an ni a, kan education policy hian chu lam chu a hawi em? kan sorkar education kalpui mekah hian ram hmasawnna tur tak tak kan beisei ngam em? tih bih chian a hun ta hle. Lai district pumpuiah 10+2 science zirna a awmlo tawp mai a,kan ram hmasawnna in technical mi a mamawh hle si a,kan project lian hmachawp mek a thawktu turte tute nge ni ta ang le? Kan ram zirna kalphung hian ram hmasawnna a tinzawn em?miten eng tin tak min ngai ang maw? Tuna kan vei leh tan kan lak em em mek lirthei neiha in tlansiak vak hian ram hmasawnna min thlen ang em le? Kan sawi mek kan chhiah (tax) lak chanve chauh hi kan mamawh human resource dept. atan hian hman ni mial mai se, pa tam tak hi chu zaikhawmlo pawhin Pathian fakin kan lam reng mai awm a sin. Kan ram hruaituten min hruai mekna hi about turn in ke pen thut se mipui kan hlim ngawt in ka ring.

Ram hmasawnna kawngkhat thlen turin Vocational training centre kan mamawh
Vocational training hian thiamna sang tak ni lo mahse an hna bik a tana mi-thiam, entirnan: Motor mechanic, Electician, plumber, tv leh refrigenerator siam, cement works etc te thiam a eizawnna atan a thawk turin kum khat emaw lek zirin mithiam bik (professional) an ni thei. Industrial Training Institute (ITI) hetiang lam zirna hawn hi kan ram mamawh a ni.

Ram hmasawnna tak tak hi chu ram rorelna leh ram hruaitute ah a in nghat thui hle a,state intodelh zawkte chanchin zir peih leh a ngaihna hria, mi tumruh ram hruaitu ramin a mamawh thin. Chutiang a nih laiin mipuiin manganga tih tak zeta Pathian an auh chuan Lalpan ramhruaitu tha a pek hun a awm thin.Chu chu bible ah kan hmu, Mosia te Nehemia te kha chutiang dinhmun atanga Pathianin a ruatte an ni.Kan ram mipui pawh hian ram hmasawnna a kan tuihal takzet hun chuan kan Pathian kan au angnga Pathian hmel a lo lang mai ang.

RING RAWH – Rbt. C. Lalchhuanmawia

Pathian rawng kan bawlna kawngah mi tam tak chu kan beidawng hma em em thin. Hei hi kan rinna a pawnlang lutuk vang niin ka hria. Thenkhat chuan amah kan hlat phah hial thin niin a lang. Mihring chuan kan thil duh a hnena kan thlen hi tuna dawn nghal zel kan duh thin. Pathian kan dil pawhin a chhanna hmuh nghal kan duh bawk thin. Nimahsela, Pathian hian min chhang a nih pawhin a duh hunah tul a tih angin min chhang a ni. Ama hun ruatah lo chuan Pathian a che ngai lo. Hei hi kan hriat thiam loh avangin kan beidawng thin.

Nasa taka kan tawngtaia, kan beih fan fana, rinna kan neih bawk chuan kan tawngtaina chu awlsam takin chhan a ni zel ang tih hi mi thenkhat inzirtir dan a ni. Hei hi a dik lo. Pathian chu ATM (Automatic Teller Machine) khawl an tih (a code number hrilh ruala a chhanna rawn phawrh nghal thin) ang hi a ni lo a nia…

Tawngtai leh Pathian hnena thil dil lampang hi chu inzirtir ngai lovin kan thiam vek mai. Amah-erawhchu, kan dilna nghah dan lai tak hi kan bangbona lai a ni a, a ngaihna kan hre lo a ni. Heti ang hunah tak hian mi tam takte chu kan rinna a lo derthawnga, kan lo tlu leh hman der thin.

Heti zawng hian i ngaihtuah teh ang. Kan tihtheih chu dil hi a ni mai. Pathian tih tur ni a lang chu kan tana tha a nih chuan kan dilna tihhlawhtlin a ni leh mai.

Pathian hnena thil kan dil tawh chuan nawr sek sek a tul lo va, a hnung kan zuina kawnga kan nunphung leh rinna amah hlat zawnga tidanglam veka nghah a tul hek lo. Lalpaa chawl chunga, Pathian hun ruat mila thil lo thleng tur chu amaha rinna tak tak nghat chunga hahdam taka nghah mai zawk tur a ni. Kan beih vak a ngai lo. “Eng vangin nge Pathianin min chhan loh” tia kan buai kan buai a ngai lo. Pathiana innghat chunga a hun takah a ti dawn a ni tih kan rin tlat chuan Pathianin min tih sak ngei ngei dawn a ni.

A hun takah a rawn thleng ang. A hun dik takah a chhanna chu a rawn thleng dawn a ni. Second khat pawhin a tlai lovang. Hemi tichiangtu a tan chuan Hebrai 11:6 thu – ‘Nimahsela, rinna lovin ama lawmzawng mi nih rual a ni lo; Pathian hnena lo kal chuanin, a ni chu a awm tih leh zawngtute hnena lawmman pek hmang a ni tih rin tir a ni,’ tih hi en i la, a chiang lehzual awm e.

Kan beiseina rilru hi i chawisang ang u. Kan rinna hi a ni Pathian chakna tichetu chu. Pathian chu mihring anga tawp chin nei leh zim tak anga ngaih chi a ni lo. A thu kan awi a, kan rin ngam phawt chuan a lak atangin malsawmna kawng hrang hrang, chhiarsen rual loh kan dawng thei ang.

A tawp berah chuan Jakoban(2:14), “Ka unau te u, miin, ‘Rinna ka nei’ ti mah sela, thiltih a neih si loh chuan engnge sawt ang?” a ti. Nang leh kei hian ‘Rinna ka nei’ ti fo thin mah i la, Pathian tan thiltih engemaw tal kan neih ve miau si loh chuan awmzia engmah a nei tak tak lo. Rinna avang ngawt hian nang leh kei hian thiam kan chang ngai lovang. (Jakoba 2:17 & 24-ah) “Chutiangin bawkin rinna chu thiltih nei lovin amah chauhvin a awm chuan thi a ni. Rinna avang ngawt ni lovin, thiltih avang zawkin miin thiam a chang thin tih in hre ta.” a ti leh zel a. Helai thu ka chhiar hian Lal Isuan Lazara farnu Marthi-i hnena, ‘I rin chuan Pathian ropuizia i hmu ang, ka ti lo che em ni?” (Johana 11:40) a tih kha ka hrechhuak leh thin. Rinna leh thiltih (rawngbawlna) kan kal tlantir tlat chuan Pathian hnathawh hi a hun takah, aman tul a tih ang zelin kan hmu ngei ngei dawn a ni. Second khat pawhin a tlai ngai lovang tih i ring tlat ang u.‘Tin, rinna hi thil beiseite awm ngeia hriatna, thil hmuh lohte hriatfiahna a ni.’ tih ziak ang khan…Lalpan a thu kan chhiarchhuah tak chu a chhiartute leh rinnaa kan unau zawng zawngte tan a tharin mal min sawm sak theuh rawh se. Amen.